Një ngjarje e rëndë ka tronditur Kenian, ku të paktën 15 nxënëse kanë humbur jetën si pasojë e një zjarri që përfshiu një shkollë me konvikt për vajza në qarkun Nakuru. Dhjetëra të tjera raportohet se kanë mbetur të plagosura, ndërsa autoritetet vijojnë operacionet e kërkim-shpëtimit dhe hetimet për zbardhjen e plotë të ngjarjes.
Sipas policisë lokale, flakët shpërthyen gjatë natës në konviktin e “Akademisë së Vajzave Utumisi”, duke përfshirë me shpejtësi ambientet ku qëndronin nxënëset. Mediat vendase raportojnë se alarmi është dhënë rreth orës 01:00 pas mesnate, sipas orës lokale, ndërsa shumë prej vajzave ndodheshin në gjumë në momentin kur nisi zjarri.
Në vendngjarje mbërritën menjëherë zjarrfikësit, ambulancat dhe forcat e policisë, të cilat punuan për disa orë për të vënë flakët nën kontroll dhe për të evakuuar nxënëset e bllokuara brenda godinës. Disa prej të plagosurave janë dërguar me urgjencë në spital për të marrë ndihmën mjekësore.
Autoritetet keniane kanë konfirmuar se zjarri tashmë është neutralizuar, por ekipet e emergjencës vazhdojnë kontrollet në ndërtesë për t’u siguruar që nuk ka persona të tjerë të mbetur brenda.
Deri më tani, shkaqet e shpërthimit të zjarrit mbeten ende të paqarta. Hetuesit kanë nisur një hetim të plotë për të kuptuar se si nisi tragjedia dhe nëse janë respektuar standardet e sigurisë në konvikt.
Ngjarja ka rikthyer edhe një herë shqetësimet mbi sigurinë në shkollat me konvikt në Kenia. Vetëm një vit më parë, në vitin 2024, një tjetër zjarr tragjik në një shkollë fillore me konvikt në qarkun fqinj Nyeri shkaktoi vdekjen e 21 nxënësve, duke ngritur debate të forta mbi kushtet dhe masat mbrojtëse në institucionet arsimore të vendit.
