Është shënuar viktima e tretë nga koronavirusi gjatë mbrëmjes së sotme.
Një pacient i shtruar në spitalin Infektiv, i konfirmuar me COVID-19, i cili vuante nga kanceri në mushkëri, ka ndërruar jetë.
Ministria e Shëndetësisë bën me dije se 71-vjeçari me origjinë nga Kuçova, i trajtuar më herët në spitalin universitar “Shefqet Ndroqi”, prej 7 ditësh ishte shtruar në spitalin Infektiv dhe gjatë mbrëmjes pati një komplikacion të menjëhershëm kardiak arterial.
I moshuari vuante nga disa sëmundje shoqëruese: Kancer mushkërie, diabet mellitus, fibrilacion arterial dhe hipertension.
“MShMS shpreh ngushëllimet familjes së të ndjerit dhe apelon dhe një herë qytetarët të respektojnë rregullat e distancimit social dhe të telefonojnë 127 në rast se kanë shenja të sëmundjes”, thuhet në njoftim.
Në Shqipëri janë konfirmuar nga ministria 89 raste pozitive me koronavirus dhe 3 viktima. Një 66-vjeçar nga Lushnja, i cili prej ditësh ishte i shtruar në Spitalin Infektiv u nda nga jeta dhe një e moshuar 73-vjeçare nga Durrësi, e cila vuante nga një sërë sëmundjesh gjithashtu ka ndërruar jetë.
/Iconstyle.al
