Kryeministri Edi Rama ka paralajmëruar masa të reja duke filluar nga e hëna për parandalimin e përhapjes së Koronavirusit në vend, në një kohë që numri i të infektuarve ka arritur në 33 dhe është shënuar edhe një viktimë në Durrës.
Kështu, sipas një njoftimi publik të kreut të qeverisë:
-Nga e hëna ndalohen spektaklet dhe emisionet me mbi dy të ftuar, pasi sipas kryeministrit janë vatra të rrezikshme:
“Prej së hënës kompanitë mediatike të ndërpresin cdo program me më shumë se dy persona në studio. Studiot që punojnë me ajër të kondicionuar që mbledhin më shumë se dy persona për spektakle janë vatra të rrezikshme. Ju lutem të evitoni ajrin e kondicionuer”.
-Prej ditës së hënë kompanitë që nuk e kanë ndalur aktivitetin duhet të sigurojnë transportin e punonjësve me autobus apo mjetet e tyre me akreditim nga policia.
“Edhe punonjësit e administratës që nuk janë shkëputur nga puna duhet të sigurohen që të pajisjen me kartelën identifikuese për të qarkulluar me automjetin e tyre privat” tha Rama.
-Ndërkohë nga dita e diel në 06:00 do të ndalohet jo vetëm qarkullimi brenda po edhe në rrugët nacionale që lidhin Vlorën me Fierin, Fierin me Lushnjen dhe Shkodrën me Lezhën, pra perimetri i mbrojtjes do të zgjerohet dhe do të ndalohet edhe qarkullimi mes Elbasanit dhe Korçës.
“Në perimetrin e blinduar do të këputen lidhjet mes këtyre qyteteve për autobusët, apo makinat private, do të qarkullojnë vetëm automjetet që hyjnë në kategoritë e lejuara brenda perimetrit Tiranë-Durrës”.
-Kudo do të mbyllen po njësoj të gjitha lokalet dhe mjediset e mbyllura sipas kategorive në Tiranë dhe Durrës.
