Pak orë pas vendimit të qeverisë për mbylljen e lokaleve të natës, diskove dhe pub-eve, policia është vënë në veprim duke mbyllur 522 lokale në të gjithë vendin.
Gjatë mbrëmjes së djeshme u mbyllën gjithashtu 29 palestra, 65 bilardo, 21 disko e pube dhe 18 lokale me muzike live.
Hapur do të qëndrojnë restorantet po me kushtin që tavolinat të kenë 2 metra distancë nga njëra-tjetra.
Vendimi vjen pas identifikimit të 10 rasteve me Koronavirus në vendin tonë, tre prej të cilëve ndodhen të shtruar te Infektivi, një në spitalin e Durrësit dhe të tjerët të izoluar në shtëpi pa simptoma.
Njoftimi i policisë:
Në zbatim të masave për moslejimin e grumbullimeve masive në ambiente të hapura apo të mbyllura, me qëllim parandalimin e përhapjes së coronavirusit, Drejtori i Përgjithshëm i Policisë së Shtetit u ka dërguar një telegram të gjitha Drejtorive Vendore të Policisë në Qarqe, për mbylljen e menjëhershme të lokaleve të natës, pubeve, diskove, palestrave e lokaleve ku ka grumbullimeve masive.
Në zbatim të këtij telegrami, prej mbrëmjes së djeshme, mbi 215 Patrulla të Përgjithshme të Policisë u angazhuan për zbatimin e këtyre masave.
Në të gjithë vendin, u mbyllën gjatë mbrëmjes së djeshme 522 lokale dhe bare, 29 palestra, 65 bilardo, 21 disko e pube dhe 18 lokale me muzike live.
Strukturat e Policisë së Shtetit do të bashkëpunojnë me Inspektoratin Shtetëror Shëndetësor, Institutin e Shëndetit Publik, Njësitë e Qeverisjes Vendore, Prefektët e Qarqeve dhe institucionet e tjera shtetërore që i ngarkon ligji.
Policia e Shtetit kërkon mirëkuptimin e pronarëve të lokaleve që të zbatojnë pa asnjë hezitim urdhrat e përcjella nga punonjësit e Policisë dhe të mos i kundërshtojnë ato, pasi moszbatimi i tyre do shoqërohet me penalitete ligjore.
/Top Channel