Ashtu sikurse ju kemi paralajmëruar pak ditë më parë (lexo këtu), këtë 8 mars nuk do të festojmë si gjithë herët e tjera, pasi falë idesë brilante të blogeres dhe shkrimtares Desantila Vatnikaj, në Ditën Ndërkombëtare të Gruas do të marrë jetë një projekt që shpresojmë të shndërrohet në traditë.
“Flas n’8 mars” titullohet eventi që do të bëjë bashkë gratë dhe vajzat përtej kufijve territorialë, për të na dhuruar të gjithëve një ditë të mbushur me frymëzim e motivim, që ka në thelb kremtimin e gjinisë femërore, me gjithë forcën e brishtësinë që e karakterizon.
Eventi do të mbahet ditën e dielën në sallën “Consortium” në “Hotel Tirana International” dhe do të vijë me një panel mbresëlënës të përbërë nga 6 gra të suksesshme, që do të rrëfejnë mbi eksperiencat, arritjet e sfidat me të cilat janë përballur në shoqërinë tonë.
Emrat e tyre janë zbuluar gradualisht në faqen në Instagram të “Flas n’8 mars” dhe ato janë:
Elona Demollari – prej më shumë se dy vjetësh drejton të vetmin burg të grave në Shqipëri, IEVP, Ali Demi.
Suela Lala – Fondacioni “Së Bashku”, aktiviste për të drejtat e personave me aftësi të kufizuar, Anëtare Bordi e Rrjetit Evropian për Jetesë të Pavarur (ENIL).
Kozara Kati – Drejtore Ekzekutive e Qendres Shqiptare për të Drejtat e Njeriut.
Atifete Jahjaga – Presidentja e parë grua e Republikës së Kosovës (2011 – 2016)
Brisilda Taco – Administratore e Shoqatës Rome “Rromano Kham’’
Elita Zylbeari Masha – Sipermarrese dhe folese motivuese nga Republika e Maqedonise se Veriut.
Eventi i shumëpritur që do të mbahet paralelisht dhe në Kosovë e Maqedoninë e Veriut, synon të sjellë në vëmendje sfidat e vështirësitë me të cilat përballen gratë shqiptare dita-ditës në një shoqëri si e jona ku të drejtat e gruas vijojnë të jenë të nëpërkëmbura.
Por shembujt ekselentë të zonjave të ftuara në panel të zgjedhura me kaq kujdes nga Vatnikaj, dëshmojnë pikërisht atë që të gjitha vajzat e gratë e tjera kanë nevojnë të dëgjojnë: Ato munden të shndërrohen në pikërisht atë që kanë ëndërruar!
