Vetëm gjysma e historisë është e vërtetë, pjesa tjetër është e nevojshme për t’u mësuar!
Sot do të flasim për një serial të ri të publikuar në nëntor të 2019-s, që titullohet “The Morning Show” dhe që na zbulon të vërtetat dhe gënjeshtrat që fshihen pas historive që dëgjojmë çdo ditë në lajme.
Mitch dhe Alex janë prej 15 vitesh miq dhe kolegë. Ata drejtojnë një emision mëngjesi së bashku që quhet “The Morning Show”, deri në momentin kur moderatori pushohet menjëherë nga puna pas akuzave për ngacmim seksual.
Kjo e lë kolegen e tij Alex Levy (Jennifer Aniston) të përballet me rrëmujën dhe dilemën se kush do të zëvendësojë Mitch-in. Producentët e televizionit kërkojnë një ndryshim rrënjësor pas këtij skandali të madh televiziv dhe kur Alex kupton se ata duan ta zëvendësojnë atë, atëherë ajo merr gjërat nën kontroll dhe njofton publikisht që jo vetëm nuk do të largohet, por edhe se kush do të jetë kolegia e saj më e re.
Është fjala për gazetaren e re por tepër energjike Bradley Jackson, (Reese Witherspoon ) e cila bëhet e famshme falë një videoje virale në internet. Dy femra marrin nën kontroll lajmet e mëngjesit, por situata nuk do të jetë aspak e lehtë kur vihen në kërkim të së vërtetës.
Alex nis t’i druhet suksesit të menjëhershëm të koleges së saj Bradley dhe kërkon të marrë merita, ndërkohë që vetë Bradley përpiqet të zbulojë më tepër se çfarë ndodhi me skandalin seksual në televizion! Kush e dinte? Pse e mbajtën të fshehur? Këto janë pyetje që kërkojnë përgjigje dhe që do ta bëjnë Bradley-n të dalë shpesh herë nga skenari duke rrezikuar vendin e punës.
Nga ana tjetër Mitch (Steve Carell) vijon të këmbëngulë se është një viktimë e pafajshme e lëvizjes #MeToo, dhe përpiqet t’i bindë të gjithë se është i pafajshëm. Të gjitha marrëdhëniet e tij që ka pasur, kanë qenë konsensuale, thotë ai. Sipas Mitch, askush nuk ka ngacmuar askënd pa dëshirën e askujt! Të jetë vërtet kështu?
Një serial i bazuar në histori të vërtetë?
“The Morning Show” nuk kishte si qëllim të bazohej në skandalin që tronditi “The Today Show” në vitin 2017, por ka shumë ngjashmëri midis historisë që sjell seriali dhe ajo që ne shohim çdo ditë dhe e injorojmë.
Të gjithë kanë nisur të bëjnë një paralelizëm të historisë që ndodh në serial, me atë që ndodhi në 2017-n kur Hoda Kotb dhe Savannah Guthrie zëvendësuan moderatorin e njohur Matt Lauer i cili u pushua nga puna pas akuzave për ngacmim seksual.
Megjithatë, përpos ngjashmërive, mbulimet që u bëjmë kolegëve në vendin e punës, dëshpërimi për të shpëtuar karrierën dhe evolucioni i gruas në media, janë disa nga çështjet më të rëndësishme që po diskutohen sot dhe që trajton edhe seriali “The Morning Show”.
Performanca e Aniston
Padyshim, një nga pjesët më të mira të “The Morning Show” ka qenë performanca fantastike e Aniston, të cilën kemi mundësi ta shohim në një zhanër tjetër, atë dramë, përpos komedisë që i shkon aq shumë për shtat te “Friends”.
Zemërimi i zjarrtë i Anistonit vihet re në një nga skenat më të mëdha në fillim të serialit, kur moderatorja merr situatën nën kontroll dhe u tregon të gjithë shefave të saj meshkuj, se kush është boss-ja.
Të vërteta të hidhura do të dalin në fund dhe një mësim i mirë për këdo se ndonjëherë, personi që është ulur pranë teje nuk është ai që ti mendon se është.
/Iconstyle.al
