Ditëlindja supozohet të jetë dita më e bukur, të paktën deri sa arrin të 30-at dhe kupton që nuk ka më kthim pas dhe nuk mund të gëzohesh me vitet që po ikin!
Pas kësaj moshe, nis të festosh edhe pse jo me shumë qejf si më parë! Por për Nadian, festa e 36-vjetorit kthehet në një makth të vërtetë që duket sikur nuk ka fund!
Sot do të flasim për serialin dramë-komedi “Russian Doll” të vitit 2019, që ka në qendër një femër flokëkuqe njujorkeze me karakter të fortë, dhe që sigurisht është krijuar nga tre femra: Amy Poehler, Leslye Headland, dhe aktorja kryesore Natasha Lyonne.
Të vdesësh është e thjeshtë, të jetosh është e vështirë!
Nadia Vulvokov (Natasha Lyonne) shkon në festën që dy mikeshat e saj kanë organizuar për ditëlindjen e saj dhe pasi dehet dhe drogohet, vdes. Ajo më pas zgjohet në tualet ndërkohë që në sfond dëgjohet kënga e Harry Nilsson – Gotta Get Up (“Gotta get up, gotta get out, gotta get home before the morning comes”).
Dhe kështu nis gjithçka. Nadia e gjen veten duke vdekur vazhdimisht, një herë duke u përplasur nga një taksi, herën tjetër nga një atak në zemër apo duke rënë në një pusetë të hapur. Pas çdo vdekjeje ajo zgjohet në të njëjtin vend dhe është e tmerruar nga kjo situatë e pakuptimtë që po i ndodh.
Nadias i duhet të zgjidhë këtë dilemë dhe të kuptojë cilat janë gabimet që e çojnë atë vazhdimisht drejt vdekjes, që më pas t’i korrigjojë ato. Ka dhe momente mjaft për të qeshur kur Nadian e frikësojnë edhe një palë shkallë, pasi e di që mund edhe të vdesë duke u rrëzuar në to!
Sikur ta dije se do të vdisje, çfarë do të ndryshoje në jetën tënde?
Nadia do të bëjë gjithçka për të kundërshtuar fatin e saj, por gjithçka duket e kotë deri në momentin që takon Alan (Charlie Barnett), një djalë i ri, i mirë në të gjitha aspektet, që çuditërisht po përjeton të njëjtën gjë si heroina jonë flokëkuqe.
Duke vdekur çdo ditë, dy personazhet kryesore kanë vetëm një detyrë: të mësojnë nga gabimet e tyre.
Veprimet tona ndikojnë te të tjerët!
Ndryshimi më i madh që ndodh në jetën e Nadias, është kur ajo e kupton që mund ta përdorë jetën e saj për të ndihmuar të tjerët dhe duke e bërë këtë, e pasuron veten.
Vdekjet e saj jo vetëm që ndryshojnë të ardhmen e saj, por edhe të ardhmen e Alan. Duke kuptuar jetën e saj, dhe në thelb duke shpëtuar veten, Nadia gjithashtu shpëton Alan-in.
Ajo e kupton se nuk është më vetëm – qoftë fizikisht apo emocionalisht – dhe pajtohet me atë se si veprimet e saj mund të prekin të tjerët.
Jo vetëm një histori imagjinare!
Edhe pse historia e Nadias është imagjinare, është e lehtë të lidhemi me të në shumë mënyra. A nuk kemi qenë të gjithë në një situatë që dëshirojmë të arrijmë diçka dhe përpiqemi e përpiqemi deri sa ta bëjmë si duhet?
Nadia na tregon sesi ndonjëherë funksionon, dhe ndonjëherë jo, dhe se kur bëjmë një zgjedhje, nuk mund të mendojmë gjithmonë për veten. Ne duhet të mendojmë për njerëzit të cilët ndikohen drejtpërdrejt nga zgjedhjet dhe veprimet tona!
Seriali i Netflix do të rikthehet për një sezon tjetër dhe jemi shumë kuriozë të dimë se çfarë do të ndodhë, pas atij fundi që askush nuk e kishte parashikuar (PA SPOILERS) Rinovimi i serialit u njoftua në qershor 2019, por ende nuk dihet se kur do të dalë. Deri atëherë, shikim të këndshëm!
/Iconstyle.al
