Nëse një njeri do të shfaqej në momentin më të nevojshëm për ty dhe do të të shpëtonte, do ta besoje dhe ndiqje atë deri në vdekje?
Para se të përgjigjeni, sot do të njiheni me një prej serialeve më të përfolur të momentit në NETFLIX, “Messiah” i cili bazohet mbi një personazh biblik, por mjaft misterioz që rrethohet nga mrekullitë.
Seriali i krijuar nga Michael Petroni me 10 episode dhe i publikuar në 1 Janar, (aktualisht i rinovuar për sezon të 2-të) promovon një figurë enigmatike që del papritur në Lindjen e Mesme dhe ka një ndikim të madh në mbarë botën falë mediave sociale.
Për disa (besimtarë), ai është fjalë për fjalë Mesihu, i dërguari i Zotit, por për të tjerë ai është një terrorist i rrezikshëm dhe ndoshta një sharlatan.
Mehdi Debhi interpreton rolin e Al-Masih, një djalë i ri që nuk bën kurrë pretendime të qarta për fuqitë e tij hyjnore, por shoqërohet nga një sërë fenomenesh mrekulluese ndërsa udhëton nëpër botë. Al-Masih i ngjan një figure të Krishtit, siç imagjinohet nga një piktor nga Rilindja Italiane, dhe rrezaton një atmosferë karizmatike, e cila i detyron njerëzit të ndjekin atë.
Ai shfaqet fillimisht në Damask, aty ku ISIS ka rrethyer qytetin dhe është gati të sulmojë. Al Masih nis predikimin, dhe në mesin e fjalimit të tij, një stuhi e madhe përfshin vendin duke mposhtur forcat e ISIS. Kjo mrekulli e parë bën që Al Masih të shihet si shpëtimtari dhe 2000 njerëz nisin ta ndjekin atë përtej shkretëtirës në kufirin e Izraelit.
Por figura e Al-Masih është e mbushur me dyshime! Përse solli 2000 vetë në kufi me Izraelin?! Thjesht për një vizitë në Tokën e Shenjtë?!
Izraelitët arrestojnë menjëherë Al-Masih, dhe një oficer inteligjent Aviram Dahan (Tomer Sisley) nis ta marrë atë në pyetje. Gjatë intervistës, Al-Masih thotë disa detaje tepër personale nga jeta e Aviramit, që askush përveç këtij të fundit nuk i di.
Me kë ka folur Al Masih? E njeh vërtet ai oficerin, apo si një njeri i Zotit, di gjithçka për bijtë e tij, dëshirat dhe mëkatet e tyre?
Papritur Al-Masih zhduket nga kujdestaria izraelite. Ai shfaqet në xhaminë Al-Aqsa të Jeruzalemit, ku shpëton një djalë duke i nxjerrë plumbin nga trupi. Më pas zhduket përsëri për t’u shfaqur në Teksas, në kohën e duhur për të shpëtuar një vajzë adoleshente nga një tornado.
I gjithë udhëtimi i tij misterioz dokumentohet me video nëpër rrjetet sociale. Njerëzit bëhen dëshmitarë të mrekullive, videot shpërndahen gjithandej dhe kjo gjë, nuk i leverdis aspak CIA-s, e cila dërgon një agjente për t’u marrë me “problemin”.
Eva Geller (një Michelle Monaghan e zhgënjyer shumë keq nga jeta), është e bindur se ai është një lloj agjenti që drejtohet nga një qeveri dashakeqe. Në mesin e problemeve shëndetësore (pasi ka abortuar fëmijë dhe bashkëshorti i ka vdekur) ajo nis ta hetojë atë dhe rrugët i kryqëzohen me oficerin izraelit. Eva madje arrin të takohet me Al Masih, i cili i thotë disa gjëra tepër personale që e bëjnë skeptike Evën por edhe e mbushin me frikë!
Nuk është për të gjithë familjen!
“Messiah” nuk është një serial për të gjithë familjen. Ka një fjalor tepër të ashpër, dhunë, përmbajtje shqetësuese dhe sigurisht skena seksi.
Aktori i famshëm izraelito-francez Tomer Sisley është qershia mbi tortë e këtij seriali, i cili dhuron edhe një skenë mjaft joshëse me Michelle Monaghan.
Femrat, në qendër!
Figura e femrës është e vendosur në qendër të serialit. Femrat mbajnë pozicione kyçe nga drejtoresha e CIA-s, agjentia Eva e deri të gruaja e një pastori që e dërgon vajzën Rebeca të abortojë pa dijeninë e bashkëshortit.
Në një moment, Al-Masih pyet një nga meshkujt që e ndjekin: Ku janë femrat? Kur burri nis të qeshë, Al-MAsih e godet atë dhe i thotë: “Jepja vendin tënd një gruaje”.
Ta besojmë apo jo!
Messiah është një personazh mjaft kontraversal. Ai citon Biblën, por edhe Kuranin. Është i rritur nga një familje myslimane, megjithëse shumë myslimanë e refuzojnë. Ai praktikon yoga, bën palestër dhe duket se miraton çdo fe (“Unë eci me të gjithë njerëzit”, thotë ai.)
Sidoqoftë, teza e CIA-s se Al-Masih po manipulohet nga famëkeqi Oscar Wallace, i cili u arratis në Rusi pasi kishte hakuar tregjet financiare të Wall Street, e zbeh figurën e Al-Masih.
SPOILER! Nga njëra anë kemi një njeri që ecën mbi ujë dhe bën mrekulli të tjera duke shpëtuar njerëz, nga ana tjetër kemi një njeri që është rritur nga një iluzionist dhe është super i zoti me truket magjike.
Në fund të fundit, ashtu siç edhe Al-Masih citon: Njerëzit do të shohin atë që duan të shohin!
