Është zbardhur sot dëshmia e Arjan Shahaj në gjykatë, i cili vrau të atin Iljaz Shahajn me sëpatë në fshatin Shalës të Memaliajt.
Ngjarja ndodhi dje dhe 35-vjeçari është vënë tashmë në pranga për krimin në familje që ndodhi pas një sherri për motive të dobëta!
Debati baba e bir kishte në qendër një vajzë me inicialet B.C., me të cilën Arjani ishte në një lidhje. Shahaj rrëfeu në gjykatë se familjarët e vajzës i ishin ankuar të atit që ai ta linte të qetë.
“Në çdo debat në familje babai më kërkonte ta lija rehat. E vrava sepse i kisha thënë të mos me hapte me muhabetin e vajzës, me të cilën kisha lidhje prej kohësh por ai sikur ma bënte kastile. Dje u bë i padurueshëm kështu që e qëllova 3 herë me sëpatë”, u shpreh 35-vjeçari.
Pasi vrau të atin dhe i mori 20 mijë lekë, Arjani u nis drejt Tiranës për të shkuar te motra e tij.
“Pasi e vrava shkova në shtëpi të merrja lekë për të ikur në Tiranë tek motra. Por kunata, nusja e vëllait nuk më dha ndaj u futa në dhomë dhe mora nga lekët e plakut, 20 mijë lekë me të cilat u nisa për në Tiranë”, tregoi ai.
Arjani ka qenë më parë i dënuar me 8 vite burg për tentativë vrasje pasi goditi me sëpatë kushëririn e tij, Edisonin.
Ai doli nga burgu pasi vuajti dënimin, por në vitin 2003, masakroi me thikë nënën e tij, e cila u shtrua në spital në Tiranë për 3 muaj.
E ëma e fali dhe nuk e denoncoi!
/Ora News
