Janë zbardhur detajet e para rreth shpërthimit të fuqishëm që ndodhi sot në zonën e ish-Bllokut në Tiranë, ku të paktën 4 persona mbetën të lënduar.
Ngjarja ndodhi në rrugën “Vaso Pasha”, në një dyqan që merret me organizime festash, ndërsa dyshohet paraprakisht se ka shpërthyer një bombël që shërben për të fryrë tullumbacet.
Pamjet e para të shpëtimit të vajzave që ndodheshin brenda dyqanit, janë publikuar nga “Shqiptarja.com”.
Vajza është ndihmuar nga forcat e policisë për të dalë nga dyqani dhe më pas është transportuar me ambulancë për në spital.
“Report tv” raporton se fillimisht janë nxjerrë një vajzë dhe një grua, ndërkohë ato kanë deklaruar se brenda dyqanit ndodhej edhe një vajzë, punonjëse.
Efektivët e policisë së rendit kanë ndërhyrë menjëherë dhe kanë bërë të mundur të nxjerrin vajzën, e cila fillimisht kishte probleme me frymëmarrjen për shkak të tymit të madh që u përhap.
Dëshmitarët e rastit shprehen se në momentin që dolën jashtë pas shpërthimit dy vajzat kanë qenë pothuajse të zhveshura pasi u kishin marrë rrobat flakë.
