Vera vjen gjithmonë me bashkëpunime për muzikën shqiptare. Një reper dhe një këngëtare pop, apo një këngëtare pop dhe një këngëtar i muzikës folklorike, është ndërthurja që duket se nuk dështon kurrë.
Por, cilat janë bashkëpunimet që nuk i prisnim të cilat duket se do të jenë hitet që do të na shoqërojnë gjatë gjithë verës?
Luana dhe Dani
Luana e luajti bukur kartën e bashkëpunëtorit surprizë për këngën e saj të re, që fillimisht u mendua se do të ishte Gena apo edhe Ylli Limani.
Por në fakt, Luana ndoqi strategjinë e vitit të kaluar, duke bashkëpunuar me një artist të njohur të muzikës folklorike, Dani, për këngën “Sonte”.
Vitin e kaluar, Luana risolli një këngë të njohur të folklorit të kënduar më parë nga Bujar Qamili, në një duet me të: “M’i dhe flakë mallit tim”.
Enca dhe Muharrem Ahmeti
Enca sapo publikoi klipin e saj të ri për këngën “Hajde”. Për herë të parë me një artist të muzikës tallava, pop star-i shqiptar duket se nuk ia ka lënë aspak në dorë fatit suksesin në club-e kësaj vere.
Eni Koçi dhe Elinel
Eni Koçi bashkëpunon për herë të parë me Elinel, reperi i njohur si tekstshkrues si edhe si krijues i disa prej këngëve më të suksesshme shqiptare.
Kënga “Larg” u publikua dje dhe ka ritme të ëmbla pop-i shoqëruar me një kitarë.
E papritur është zgjedhja e një balade për të nisur verën.
Kida dhe Lyrical Son
Kida spikati për herë të parë me “Rikthejm na”, një bashkëpunim me reperin e njohur MC Kresha.
Pas vitesh me projekte solo ose në bashkëpunim me artistët e tjerë të kompanisë “ON Records” ku ajo bënte pjesë, në janar Kida u shkëput nga menaxherët prej 8 vitesh duke paralajmëruar projekte të reja si artiste e pavarur.
Dje, ajo zbuloi se do të rikthehet në muzikë me një bashkëpunim me reperin Lyrical Son, bashkëpunëtori i pandashëm i Kreshës, me të cilin nisi karrierën.
Ronela Hajati dhe Don Phenom
Don Phenom e kemi parë të bashkëpunojë me disa nga vajzat më të suksesshme të skenës sonë: Tayna, Enca dhe tani, është bërë bashkë me Ronela Hajatin për një projekt të ri, imazhin e parë nga i cili këngëtarja e publikoi pak më parë.
Ajo paralajmëroi se do të jetë një superhit, duke shkruajtur:
“Ju mendoni se e dini, por as që ia keni idenë!”
