Një nga legjendat urbane që vijon të përflitet për vite me radhë në Shqipëri dhe të cilën mund ta përmbledhim me një fjali është: “Duhet të jesh korçar që të fitosh Lotarinë Amerikane!”
Janë të rrallë shqiptarët të cilët nuk e kanë dëgjuar parashtrimin e mësipërm, sikundër janë edhe të rrallë personat që e dinë të vërtetën që fshihet pas kësaj legjende urbane.
Rikujtojmë se Ambasada Amerikane gjithnjë ka pohuar se përzgjedhja është tërësisht e rastësishme, duke iu dhënë fund në njëfarë mënyre aludimeve se korçarët përzgjidhen me qëllim.
Mirëpo në mes të gjithë kësaj zallamahie, ekziston një e vërtetë, siç e thamë edhe pak më lart.
I pari shqiptar që ka shkuar në Shtetet e Bashkuara të Amerikës ka qenë nga Korça dhe duhet thënë që ky fat i ka ndjekur për vite me radhë edhe korçarët që iu ka dalë Lotaria Amerikane. Pra është një rastësi dhe fat i fillestarit gjithashtu që, siç është e dukshme korçarët e kanë në masë.
“Meganews.al” shkruan se Kolë Kristoforit është i pari korçar që ka shkuar në Amerikë në vitin 1884 dhe historia e tij është e mbushur plot e përplot me surpriza.
Pas pothuajse 6 vitesh ai u rikthye në fshatin e tij i veshur me rroba alla frënga, dhe me shumë para me vete.
Ai iu rrëfeu të gjithëve ato çka kishte parë në Amerikë dhe se asokohe një punëtor fitonte 10 dollarë në ditë, duke shitur lule e fruta në rrugë, ndërkohë një punëtor në Shqipëri mezi i bënte në një vit.
Për të gjithë ata që janë kuriozë, pionierët e parë shqiptarë në Amerikë janë: At. Kolë Kristofori, Hari Take Rrapo Laska, Dhoskë Sotir Adham, Thoma Sotir Adham, Josif Sotir Adham, Sotir Lezi, Geli Goni Stevenson, At Dhosi Katundi, Dhime Pano Peterson, Fani Kosta, Thoma Kosta, Hari V. Kaçka, Argjir Peto, Fani Cico Angjel, Dhima Andrea Pano, Rrapi Fanes, Toli Dhami…/llotariaamerikane.com
