Mëngjesi i kësaj të hëne ishte tragjik për një familje në fshati Breg të Pukës. Shtëpia e familjes Ndoj, në të cilin banonin 8 pjesëtarët e saj, u përfshi nga flakët rreth orës 02:00.
Nga ngjarja e rëndë raportohet se, humbi jetën Petrit Ndoj, 40 vjeç dhe bashkëshortja e tij, Dava Ndoj, 35 vjeçe. Viktimat mësohet se po flinin në katin e dytë të banesës dhe nuk arritën dot të dilnin të gjallë prej saj.
Zjarrit i shpëtuan katër fëmijët e çiftit 15, 13, 12 e 11 vjeç, të cilët u hodhë nga dritarja dhe gjyshërit e tyre, që ndodheshin në katin e parë. I zoti i shtëpisë, Pal Gjoni rrëfeu për “News 24” tmerrin që përjetoi.
“Kam dëgjuar tjegullat që kërcisnin kur më doli gjumi. Jam zgjuar shpejt, kisha hallin e fëmijëve. I thirra djalit që të nxirrte gruan që kam të paralizuar. Ai nuk mu përgjigj kurrë. U gëzova kur pashë që fëmijët ishin në oborr. Ajo që më ndodhi mua, mos i ndodhtë kujt”, tha i moshuari.
Sipas dyshimeve të para shkak i zjarrit mund të ketë qenë një shkëndijë elektrike.
“Viktimat mund të kenë ndezur ndonjë pajisje elektrike në dhomë. Gjithsesi kjo ende nuk është konfirmuar zyrtarisht sepse hetimet nuk kanë mbaruar”, thonë burimet për “Top Channel”.
