Gardisti Alket Arapaj ka dhënë dëshminë sot në polici pasi u arrestua për vrasjen e bashkëshortes së tij mëngjesin e kësaj të marte në Tiranë..
44-vjeçari është shprehur se e vrau gruan pasi ajo e tradhtonte dhe këtë e kishte kuptuar kohët e fundit.
“Gruaja më tradhtonte prandaj e vrava. Kohë e fundit ishin shtuar dyshimet për tradhëti. Më vjen keq për vajzën, jam familjar i rregullt” mësohet të ketë thënë Arapaj sipas newsbomb.al.
Krimi në familje ndodhi në banesën e tyre në zonën e Alliasit, ku Arapaj qëlloi për vdekje bashkëshorten 36-vjeçare Ervilma Seferaj me të cilën ka një vajzë.
Familja e tyre njihej për sjellje të mirë dhe ishte predikuese e fesë islame.
Kanë qenë fqinjët ata që kanë njoftuar policinë, pasi kanë dëgjuar të shtënat në banesën e çiftit.
Policia pasi ka mbërritur në vendngjarje ka arrestuar në flagrancë, 44-vjeçarin.
Njoftim i policisë:
Shërbimet e Policisë të Komisariatit Nr.5, në bashkëpunim me SHÇBA arrestuan në flagrancë shtetasin A. A., 44 vjeç (punonjës në Gardën e Republikës).
Rreth orës 06:00 të mëngjesit, në banesën e tij në Allias, ai dyshohet se ka vrarë me armën e shërbimit bashkëshorten, 36 vjeçe.
Materialet iu referuan për veprime të mëtejshme Prokurorisë së Rrethit Gjyqësor Tiranë për veprën penale “Vrasje për shkak të marrëdhënieve familjare”.
