Akademiku i njohur shqiptar Rexhep Qosja është ndarë nga jeta në moshën 89-vjeçare. Lajmi është konfirmuar nga familjarët e tij përmes një njoftimi zyrtar, të publikuar në rrjetet sociale, ku bëhet e ditur edhe se ceremonia e varrimit është zhvilluar në rrethin më të ngushtë familjar.
Sipas njoftimit, akademiku ka lënë amanet që të mos organizohej ceremoni pritjeje publike dhe që familja të mos marrë pjesë në aktivitete institucionale. Familjarët kanë kërkuar respektimin e privatësisë, duke theksuar se dëshirojnë të mbajnë zi në qetësi.
Rexhep Qosja ishte një nga figurat më të rëndësishme të letërsisë dhe mendimit kritik shqiptar. I lindur më 25 qershor 1936 në Vuthaj, ai la gjurmë të thella në fushën e studimeve albanologjike, kritikës letrare dhe publicistikës.
Gjatë karrierës së tij të gjatë, ai ka mbajtur detyra të rëndësishme akademike, përfshirë drejtimin e Institutit Albanologjik të Prishtinës dhe angazhimin si profesor në Fakultetin Filologjik të Prishtinës. Ai është autor i dhjetëra veprave që trajtojnë letërsinë shqipe, historinë kulturore dhe çështjet kombëtare.
Ndër veprat e tij më të njohura përmenden “Vdekja më vjen prej syve të tillë”, “Anatomia e kulturës” dhe “Bijtë e askujt”, të cilat kanë pasur jehonë të gjerë edhe jashtë hapësirës shqiptare.
Lajmi për ndarjen e tij nga jeta ka sjellë reagime të shumta në botën akademike dhe politike shqiptare, ku vlerësohet si një humbje e madhe për kulturën dhe mendimin intelektual shqiptar.
