Trajneri i FC Barcelona, Hansi Flick, ka folur pas ndeshjes së fituar ndaj Celta Vigo, duke konfirmuar shqetësimin për gjendjen fizike të dy lojtarëve të skuadrës, Lamine Yamal dhe Joao Cancelo.
Sfida e së mërkurës në La Liga përfundoi me tri pikë për katalanasit, të cilët ruajnë diferencën prej 9 pikësh me Real Madridin në krye të tabelës. Megjithatë, fitorja u shoqërua me dy dëmtime të rëndësishme që kanë shqetësuar stafin teknik.
Lamine Yamal u detyrua të largohej nga fusha pasi shënoi një penallti, duke ndjerë menjëherë dhimbje muskulore. Po ashtu, Joao Cancelo la fushën më herët për shkak të një problemi fizik.
Në konferencën për shtyp pas ndeshjes, Hansi Flick u shpreh i kujdesshëm për situatën, duke theksuar se ende nuk ka një diagnozë të plotë. “Do të duhet të presim rezultatet mjekësore. Nuk duket diçka e lehtë, duhet ta pranojmë. Edhe për Cancelon situata është e njëjtë. Shpresojmë të mos jenë dëmtime serioze”, deklaroi ai.
Trajneri gjerman foli edhe për paraqitjen e skuadrës, duke pranuar vështirësitë gjatë ndeshjes. Sipas tij, pjesa e parë ishte e komplikuar për shkak të lojës së mirë të Celta Vigos, por në fund ekipi arriti të marrë rezultatin e dëshiruar.
“Jemi të kënaqur me fitoren. Na është dashur të vuajmë shumë. Celta luan shumë mirë dhe nuk ishte ndeshje e lehtë. Por ajo që ka rëndësi janë tre pikët”, shtoi Flick.
Barcelona tani pret analizat mjekësore të dy lojtarëve, ndërsa shqetësimi kryesor mbetet gjendja e Yamal, një prej talenteve më të rëndësishëm të skuadrës këtë sezon.
