Ministrja e re e Arsimit, Besa Shahini ka prezantuar projektin e ri që do t’u vijë në ndihmë të studentëve shqiptarë.
Një rubrikë e re është hapur në portalin “Shqipëriaqëduam.al”, që quhet “Unë jam student dhe kam një pyetje” dhe do t’u shërbejë studentëve për çdo paqartësi që kanë.
Përgjigje për paqartësitë që kanë, studentët do të marrin edhe në Facebook-un e Ministrisë së Arsimit, u shpreh Shahini:
“Kemi mundësuar që përmes portalit Shqipëriaqëduam.al të kemi një rubrikë ku i kthejmë përgjigje pyetjeve tuaja që mund të keni për të sqaruar sa më shumë mënyrën se si zbatohen VKM-të për tarifat dhe me bursat. Rubrika quhet: Unë jam student dhe kam një pyetje.
Edhe në Facebook-un e Ministrisë së Arsimit do të kthehen përgjigje Live për të gjithë studentët që kanë pikëpyetje. Dje dhe sot personat nga ministria e arsimit i keni dhe në sekretari që do t’ju kthejnë përgjigje nga aty për çdo pyetje. Studentët që po bllokojnë sekretaritë t’i zhbllokojnë ato që të vazhdojë puna”, tha ministrja e re e Arsimit Besa Shahini në një deklaratë për mediat.
Besa Shahini pritet të votohet sot në Parlament së bashku me 5 ministrat e tjerë të rinj, në postin e Ministres së Arsimit, duke zëvendësuar kështu Lindita Nikollën.
