Aksidentet rrugore janë gjithmonë në shtim dhe këtë herë katër të rinj kanë pasur fatin e keq që të përfundojnë jashtë rruge.
Ngjarja ka ndodhur mbrëmjen e djeshme rreth orës 01:38, ku mjeti, tip “Benz” me targë AA 233 VG, me drejtues Florid Sina, ka humbur kontrollin dhe është përplasur me murin anësorë të rrethrrotullimit, në rrugën Ura Teknologjike TEG.
Mësohet se deri më tani nga katër të plagosurit dy prej tyre gjenden në gjendje të rëndë në spitalin e Traumës.
- Drejtuesi i mjetit Florid Sina, 28 vjeç nga Tepelena, banues në Tiranë, tashmë ndodhet jashtë rrezikut për jetën.
- Xhesjana M., 20 vjeç nga Përmeti, studente në Tiranë, e cila për fat të mirë ndodhet jashtë rrezikut për jetën.
- Era R., 20 vjeçe nga Pogradeci, studente në Tiranë, e cila ndodhet në reanimacion, në gjendje të rëndë.
- Altion Agalliu, 27 vjeç nga Tirana, i cili gjithashtu ndodhet në gjendje të rëndë.
Pas aksidentit Agalliu është larguar vetë nga vendi i ngjarjes, por mëngjesin e sotmë, rreth orës 08:00, ai është sjellë në gjendje të rëndë në spitalin e Traumës.
Sipas policisë nga verifikimet e bëra drejtuesi i mjetit nuk ka qenë nën efektin e alkoolit, mirëpo dyshohet se shkak për aksidentin ka qenë shpejtësia e madhe e mjetit. Verifikimet vazhdojnë deri në zbardhjen e plotë të ngjarjes, ndërkohë që policia ka arrestuar drejtuesin e mjetit, Florid Sina.
