Papa Francesku ka pritur sot në Vatikan një delegacion prej 200 shqiptarësh, të cilët përkujtuan 550-vjetorin e vdekjes së heroit tonë kombëtar Gjergj Kastrioti Skëndërbeut. Gjatë takimit, kreu i Kishës Katolike ka kujtuar Skënderbeun me superlativa dhe nënvizoi se ai mbrojti me guxim vlerat shpirtërore dhe emrin e krishterë, aq sa të meritonte titullin ‘Athleta Christi’.
Papa Françesku u kujtoi të pranishmëve faktin se gjatë epokës së Perandorisë Otomane, Skënderbeu ka patur marrëdhënie me 5 papa: Eugjenin e Katërt, Nikolonë e Pestë, Kaliston e Tretë, Pion e Dytë dhe Palin e Dytë. Dëshmi e kësaj është se edhe në ditët e sotme, në një pallat pranë selisë presidenciale të Italisë ndodhet një afresk që portretizon heroin shqiptar.
“Pak herë në histori një individ i vetëm ka mishëruar në mënyrë kaq të qartë dhe në masë kaq të madhe virtytet e një populli, deri në atë pikë sa është e vështirë të kuptosh shpirtin e tij pa u fokusuar tek parimet dhe vlerat që mishëruan këtë personazh unik” – tha Papa.
Gjithë grupi i shqiptarëve, pas takimit me Papa Françeskun, është nisur drejt teatrit Argjentina, në qendër të Romës, ku në orën 20.30, 10 artistë shqiptarë me famë botërore do të performojnë në koncertin me temë “Të bashkuar në muzikë, në kujtim të Skënderbeut”. Dua Lipa, Ermal Meta, Inva Mula, Olen Çezari, Ramë Lahaj, Genc Tukiçi, Eno Peçi, Elhaida Dani, Lorik Cana dhe Erza Muqolli, këngëtarja 8-vjeçare, aq e dashur për publikun francez, janë yjet shqiptare në koncertin e Romës për Gjergj Kastriotin.
