Ashtu si babai i Stresit, Sali Lushaj, edhe nëna e reperit të njohur thotë se arrestimi i djalit të saj ishte një pabesi dhe një “hakmarrje 24 orëshe” pasi i shoqi i saj paditi Taulant Ballën.
“Padia që i bëri bashkëshorti im zotit Taulant Balla, mënjeherë u kthye restoja me ndalimin dhe arrestimin e Stresit. Pra është një hakmarrje 24 orëshe”, shprehet ajo për “Panoramën”.
Shpresa Lushaj i doli në mbrojtje djalit të saj duke mohuar se ai është pjesë e një bande apo grupi kriminal.
“U bë një gjyq pa njoftuar fare, duke thënë se ishte në procedim, po e ndiqnin. Një vendim i pabesueshëm në kuptimin që nuk ka ndodhur një krim, Stresi nuk është as bandë dhe as grup kriminal. Absolutisht është një artist i lirë”, ka shtuar ajo.
Arkimed Lushaj u arrestua dy ditë më parë në një hotel në Tiranë. Ai kishte vetëm 3 ditë që kishte prezantuar këngën për festivalin “Kënga Magjike”, që ia dedikon nënës së tij.
Stresit gjatë arrestimit iu gjet një armë dhe drogë, por sipas nënës së tij arma nuk është e tij. Ajo u shpreh se djali ka qenë në një ditëlindje dhe më pas ka fjetur në hotelin ku u arrestua nga policia.
