Greqia është në zi, pas zjarrit katastrofik që përpiu zonën e Atikës dhe i mori jetën 83 personave si dhe la të plagosur qindra të tjerë.
Në këto ditë të vështira për shtetin fqinj, dhjetëra persona janë sensibilizuar me tragjedinë dhe kanë ofruar ndihmën e tyre. Një ndër to është edhe shtetasi shqiptar që jeton në Greqi Petrit Athanasi, i cili është cilësuar si hero për gjestin e tij human. Athanasi është pronar i një supermarketi në Greqi dhe prej momentit që ndodhi tragjedia, ka shpërndarë ushqime falas.
Në një lidhje telefonike për ‘New24’ Athanasi tha se gjesti i tij është diçka i vogël përballë një situate të rëndë në zonat e prekura nga zjarri.
“Situate e rëndë, ndihmat janë gjëja më e vogël. Furnizoj furgona dhe makinat me ushqime. Do vazhdoj të ndihmoj njerëzit ne Greqi, pasi është diçka e vogël në krahasim me atë që ka ndodhur. Kur djali im luan me fëmijët aty, s’mund t’i la pa ndihmuar”, – u shpreh shqiptari Petrit Athanasi.
Fatmirësisht biznesi i tij dhe 2 hotele të tjerë nuk u dogjën nga zjarri.
“Deti dhe mali u bë një. Kjo tragjedi nuk është parë deri më sot. Është djegur e gjithë zona. Kanë shpëtuar vetëm 2-3 hotele dhe marketi im. Zjarre nga të gjitha anët. U dogj gjithçka. Hidheshin njerëzit në det. Unë hodha familjarët e mi në det dhe jam kthyer për të ndihmuar të tjerët. Unë i kam ndihmuar të gjithë, jo vetëm shqiptarët. I kam ndihmuar me ushqime dhe çdo gjë falas. Shokët e djalit tim nuk po gjenden ende”- ka thënë Petrit Athanasi.
Burimi: News 24
