Futbollistët shqiptarë, Granit Xhaka dhe Xherdan Shaqiri i ngritën peshë zemrat e gjithë shqiptarëve duke festuar me simbolin e shqiponjës me duar pas dy golave që shënuan ndaj ekipit të Serbisë. Një veprim ky që u përfol gjatë jo vetëm në Shqipëri, por dhe më gjerë dhe madje FIFA i gjobiti edhe me një gjobë prej 10 mijë frangash zviceriane futbollistët shqiptarë.
Mirëpo pas këtij veprimi Federata Zviceriane e Futbollit ka nisur bisedimet për të detyruar gjithë futbollistët që të mbajnë vetëm një shtetësi, pasi në të kundërt do të përjashtohen nga ekipi përfaqësues.
“Ky incident tregon se ka një problem. Duhet të pyesim veten: a duam shtetas të dyfishtë?”, u tha në një deklaratë zyrtare.
Pjesë e ekipit Kombëtar të Zvicrës janë edhe tre futbollistët shqiptar, Granit Xhaka, Xherdan Shaqiri dhe Blerim Xhemaili. Madje Shaqiri ka 3 shtetësi: zvicerane, shqiptare dhe kosovare.
Futbollistët shqiptarë do të vihen përballë një zgjedhjeje të vështirë dhe ende nuk dihet se cili do të jetë vendimi i tyre.
