Në Massachusetts, një Bearhawk LSA-8X është përmbysur gjatë një uljeje emergjente në Cape Cod Gateway Airport, duke shkaktuar panik dhe ndërhyrje të menjëhershme të ekipeve të emergjencës.
Ngjarja ndodhi rreth orës 15:30 me orën lokale, teksa aeroplani privat po përpiqej të ulej në pistën 24 të aeroportit. Sipas autoriteteve lokale, në rrethana ende të paqarta, avioni humbi ekuilibrin gjatë manovrës së uljes dhe përfundoi i përmbysur në anën jugore të pistës.
Në bord ndodhej vetëm piloti, i cili fatmirësisht shpëtoi me lëndime të lehta. Policët dhe zjarrfikësit mbërritën menjëherë në vendngjarje, ndërsa piloti mori ndihmën e parë aty, pa qenë e nevojshme transportimi në spital.
Pamjet nga aeroporti treguan ekipet e emergjencës duke punuar rreth avionit të përmbysur, i cili nuk duket të ketë pësuar dëme të mëdha pavarësisht incidentit dramatik. Autoritetet konfirmuan gjithashtu se nga përplasja pati një rrjedhje të vogël karburanti në një zonë me bar pranë pistës, por situata u neutralizua shpejt nga zjarrfikësit, duke shmangur çdo rrezik të mëtejshëm.
Për shkak të incidentit, aeroporti u mbyll për afro 45 minuta, ndërsa fluturimet u pezulluan përkohësisht. Sipas raportimeve, aeroplani ishte nisur më herët nga parku ajror në Falmouth. Hetimet për zbardhjen e plotë të shkaqeve të aksidentit vijojnë ende.
