Urime! Është dita jote më e rëndësishme! Të bëhesh nuse është një nga momentet më të bukura dhe më të veçanta në jetën e një femre, por edhe një nga më të kushtueshmet, më besoni!
Kishte mbetur edhe një muaj para dasme dhe gjithçka që mendoja ishin, makijazhi, flokët, trajtimet e fytyrës, trupit, dieta, kërcimi, njerëzit etj etj. Në telefon mund të kisha ruajtur me qindra foto nusesh. Çdo ditë dëgjoja këshilla nga të martuar dhe beqarë në lidhje me atë që duhet dhe s’duhet të bëja dhe mendja ime ishte një lëmsh i vërtetë.
Fatmirësisht fustanin dhe lokalin ku do të mbahej ceremonia e kisha vendosur. Duke qenë se dasmën nuk do ta bëja në Tiranë, parukieren për dy netët e ceremonisë, të nuses dhe të dhëndrit (sikur të mos mjaftonte një), e gjeta në qytetin tim aty ku martohesha, në Korçë.
Por më mundonte një gjë e madhe! Ndryshe nga dasmat dhe çiftet e huaja, sot çiftet shqiptare i kushtojnë një ditë të plotë vetëm setit fotografik, duke shkuar në vende të bukura për të dalë sa më këndshëm dhe për t’i pasur kujtim momentet e çmuara.
Bashkë me partnerin vendosëm të bëjmë fotot në Shkodër, në veri të qytetit, aty ku gjenden fusha të mëdha me lulen livando (Kliko Këtu), që të bëjnë të dukesh sikur je në fushat e Provancës në Francë.
Ideja më e mirë për të bërë makijazhin dhe flokët, ishte të gjeja një parukiere në Tiranë, aty ku jetoj dhe sa më afër Shkodrës. Këtu nisi sfida për mua.
Që të bëhesha nuse në Tiranë, duhet të paguaja 40 mijë lekë të rinj për një ditë, pra 400 mijë lekë të vjetër. Në rast se do të kisha dy netë ceremonie, përfitoja një ulje prej 10 mijë lekësh, dhe mund të paguaja 30 mijë lekë ditën.
Por ky nuk ishte rasti im. Unë kisha setin e fotove dhe doja të bëhesha një nuse shumë e thjeshtë. Një onde të lehtë flokëve dhe një makijazh për setin që do ta bëja 3 ditë para ditës së dasmës.
Fillimisht kontaktova me dy sallone në Tiranë që më premtuan se do të më nxirrnin një nuse shumë të bukur dhe nuk e vura në dyshim, deri kur më thanë se duhet të paguaja 40 mijë lekë. Po, po, 40 mijë lekë të rinj për flokët dhe makijazhin! (Sa për informacion 40 mijë lekë të rinj pagova në qytetin tim dhe u bëra nuse 4 herë).
E vetmja gjë që më shkoi në mendje dhe që ma sugjeruan dhe të tjerë, ishte të mbaja sekret faktin që do të bëhesha nuse. Kontaktova një sallon në Tiranë, pasi pashë fotot në Instagram dhe lashë një takim herët në mëngjes për të stiluar flokët dhe grimin, për një “event shumë të rëndësishëm”.
“Fejohesh?”, më pyeti parukierja mëngjesin kur shkova të bëhesha gati.
“Jo, martoj vëllanë dhe dua të bëhem shumë e bukur”, i thashë dhe nuk ishte gjëja e parë që më erdhi në mendje, se kisha gjithë natën që mendoja: “Si do t’i them?” “Po sikur të më dalë gënjeshtra?”
Si përfundim dola aq bukur, saqë parukierja më tha se nusja e vëllait do të më merrte inat kur të më shihte se ia kisha kaluar në ditën e saj të madhe. Më pëlqeu shumë vetja dhe nëse ndodh që ta lexojë këtë shkrim, i kërkoj falje për gënjeshtrën. Gjithashtu i them se nuk do të doja të më bënte më të bukur se aq, edhe sikur të paguaja 40 mijë lekë.
Në fund pagova 10 mijë lekë të rinj dhe i kurseva vetes 30 mijë lekë, që nuk janë pak për një nuse, duke marrë parasysh shpenzimet që ka. A jam penduar për atë që bëra? Jo, aspak dhe këtë ia këshilloj çdo vajze si unë që nuk ka mjaftueshëm buxhet për shpenzime të tilla.
Burimi: Iconstyle.al
Ndalohet kopjimi dhe ribotimi pa lejen e redaksisë
