Kanë kaluar vetëm 7 ditë nga ngjarja e rëndë që tronditi kryeqytetin, kur Xhaferr Mata 31 vjeç vrau ish – të dashurën 19 vjeçare Xhuljeta Çuni.
Nga “Panorama” është mësuar se pas kësaj ngjarjeje tronditëse shtëpia e prindërve të Xhaferrit është nën mbikëqyrje të policisë 24 orë. Taip Mata babai i të ndjerit ka thënë që këtë vendim e ka marrë vetë policia pasi ata nuk kanë bërë kërkesë për mbrojtje.
Ndëkohë babai i 31 – vjeçarit ka treguar për gazetën “Panorama” se ai është në pritje të një takimi me familjarët e Xhuljetës, pas ngjarjes fatkeqe që tronditi të dyja familjet.
“Jam në pritje të një përgjigjeje. Përmes një njeriut tim, i kam çuar fjalë babait të vajzës. Tani po pres që të takohemi dhe të bisedojmë” – ka thënë Taip Mata.
“Çdo fjalë e thënë pa menduar, në mërzitje e sipër dhe në trishtimin që na ka rënë për pjesë të përjetojmë, do na rëndonte më shumë, ne dhe ata” – është shprehur më tej babai i të ndjerit.
Ai gjithashtu ka pranuar se ngjarja mund të parandalohej, nëse Policia apo Prokuroria do të kishin vënë në dijeni familjen e Xhuljetës.
