Ditën e shtunë, kreu i qeverisë Edi Rama zbuloi përmes një dedikimi emocionues se nëna e tij Aneta po vuan nga një sëmundje e vështirë.
Ramës iu dorëzua në Vlorë një çmim që nderon nënën e tij. Urdhri i Stomatologjisë Shqiptare, i kishte akorduar asaj titullin “Nderi i Stomatologjisë Shqiptare”.
Por duke qenë se ajo nuk mundi ta merrte personalisht çmimin, kryeministrit shkoi në Vlorë ku u mbajt ceremonia, në vendlindjen e nënës së tij.
Mjekët pohojnë për “Gazeta Shqiptare” se para pak muajsh, Aneta Rama i është nënshtruar një operacioni në toraks (kraharor) e sipas tyre, gjendja e saj po mbahet nën kontroll.
Hera e fundit që Aneta Rama është parë të lëvizë, ishte data 11 e këtij muaji, ditë që lidhet me 20-vjetorin e humbjes së bashkëshortit të saj, z. Kristaq Rama.
Ajo ka qenë në varrezat e Sharrës ku prehet skulptori, dalje e cila është konsultuar paraprakisht me mjekët dhe është realizuar në kushte të veçanta.
Mjekët janë treguar shumë të rezervuar me informacionin në lidhje me shkallën e sëmundjes së Aneta Ramës, e cila më 1 shtator 2018, pra këtë vit mbush 80 vjeçe.
