Asnjëherë nuk është shumë vonë për të rregulluar buzëqeshjen.
Shumë prej të famshmëve që ne sot shohim dhe admirojmë në televizion, nuk do të ishin ata që janë pa rregulluar dhëmbët. Mjaftojmë të përmendin aktorin Tom Cruise, Princin Harry apo këngëtaren Gwen Stefani, për të dhënë shembullin se rregullimi i dhëmbëve është investimi më i mirë që mund të bësh për veten dhe imazhin tënd.
Duke qenë VIP-a, kjo gjë na duket normale dhe shpesh harrojmë që ata kanë po të njëjtat vuajtje si ne. Edhe figura të njohura shqiptare kanë sakrifikuar për të pasur dhëmbë perfektë. Telat e dhëmbëve kanë qenë zgjidhja për shumë të famshme që sot njihen për buzëqeshjen e bukur. Ne po ju sjellim disa prej tyre që kanë mbajtur tela dhëmbësh, për t’ju shtyrë ju që po e mendoni dy herë, për t’i vendosur.
Çiljeta Xhilaga
Më mirë vonë sesa kurrë! Me siguri që këngëtarja Çiljeta Xhilaga po mendonte këtë thënie kur vendosi të bënte diçka për buzëqeshjen e saj. Ajo ishte 31 vjeçe (sot 33) kur vendosi për herë të parë tela dhëmbësh dhe këtë e tregoi në disa intervista në 2016-n. “E gjeta në moshën 31 vjeç që të rregulloj dhëmbët”, tha Çiljeta, e cila tha se kishte ndërprerë dhe dhënien e intervistave për një kohë, për shkak të kësaj arsyeje. Megjithatë telat e dhëmbëve nuk e ndaluan Çiljetën që të performonte dhe të vijonte me aktivitetet muzikore.
Beatrix Ramosaj
Këngëtarja kishte bërë konfuzë fansat gjatë gjithë kësaj kohe me fotot e saj ku mbulonte gojën ose nuk qeshte. Dhe në fakt, Beatrix e zbuloi sot se gjatë gjithë kësaj kohe, ka pasur tela në dhëmbë dhe më në fund ka ardhur koha që t’i heqë. “Më në fund po heq telat. Sot është një ditë e lumtur. Tani jam gati për të xhiruar klipet e reja. U riktheva”, shkruan këngëtarja në Instastory. Besojmë që pritja ia vlejti dhe më në fund ka një dritë shprese që të shohim një buzëqeshje në fytyrën e Beatrix Ramosaj.
Genta Ismajli
Genta Ismajli është këngëtarja e cila është përfolur shumë për ndërhyrjet kirurgjikale që mund të ketë kryer. Këtë dyshim e ngre çdo foto e publikuar nga Genta, që ndryshon shumë nga fillimet e karrierës së saj. Megjithatë, një ndërhyrje të sigurt që këngëtarja e ka pranuar është rregullimi i dhëmbëve. Prej disa kohësh ajo ka mbajtur tela në pjesën e poshtme të dhëmbëve dhe këtë e shfaqi fillimisht në një video-tutorial për makijazhin.
Isida Mollaymeri
Balerina ka qenë shumë entuziaste kur ka dhënë lajmin për vendosjen e telave në vitin 2016. Ajo publikoi një foto nga Stambolli ku shkruante “e lumtur me telat e mi”. Isida kishte vendosur një aparat ortodontik fiks, për të korrigjuar dhëmbët dhe harkun e nofullës. Nuk e dimë se sa e lumtur është sot por rezultati është ai i duhuri. Me sa duket, një balerinë, e di që me disiplinë dhe punë, mund të arrish rezultatin që do.
