Spanja nuk do të marrë “asnjë vendim” për ankorimin e anijes turistike që ka të ngjarë të jetë një vatër e koronavirusit, ndërsa “të dhënat epidemiologjike” po analizohen, njoftoi sot Ministria Spanjolle e Shëndetësisë, duke kundërshtuar OBSH-në.
“Bazuar në të dhënat epidemiologjike që do të mblidhen në anije gjatë kalimit të saj nëpër Kepin e Gjelbër, do të vendoset se cila ndalesë e ndërmjetme është më e arritshme. Deri atëherë, Ministria e Shëndetësisë nuk do të marrë asnjë vendim, siç e kemi informuar Organizatën Botërore të Shëndetësisë”, shkroi ministria në X, pak pasi OBSH konfirmoi se Spanja kishte pranuar të mirëpriste anijen turistike në Ishujt Kanarie.
Ministria e Shëndetësisë raportoi më vonë se kishte pasur një takim me OBSH-në dhe ishte rënë dakord që, “që nga kjo pasdite, anija do të inspektohet nga një ekip epidemiologësh”.
“Kjo ndërhyrje synon të bëjë të ditur gjendjen shëndetësore të personave në bord, të përcaktojë nëse ka persona të tjerë atje që kanë shfaqur simptoma dhe të identifikojë kontaktet me rrezik të lartë ose të ulët. Kjo do të ndihmojë në marrjen e vendimeve në lidhje me procedurat e riatdhesimit dhe itinerarin e anijes”, shtoi ministria në postimin e saj në X.
“Gjithçka është gati për trajtim, për vlerësim dhe, nëse është e nevojshme, për dezinfektim, nëse kërkohet nga OBSH-ja”, tha zëdhënësja e qeverisë Elma Sais pas mbledhjes së kabinetit, pa specifikuar nëse kjo nënkupton që anija do të ankorohet në territorin spanjoll apo jo.
Nga Brukseli, ku ndodhet për vizitë presidenti rajonal i Ishujve Kanarie, Fernando Clavijo, ai vlerësoi nga ana e tij se “anija turistike duhet të kujdeset aty ku është”, në Kepin e Gjelbër, në Atlantik ose të ridrejtohet në “Holandë”, sepse “ka flamur holandez”.
“Ky është një rast që na shqetëson shumë, praktikisht nuk kemi asnjë informacion në lidhje me vektorin e transmetimit”, vazhdoi ai, duke folur për shtypin.
Sot, OBSH-ja raportoi shtatë raste, dy të konfirmuara në laborator dhe pesë të dyshuara.
Kujtohet se tre persona kanë vdekur në lidhje me shpërthimin e regjistruar në anijen holandeze turistike , një çift holandez 70-vjeçar dhe një pasagjer gjerman.
