Ata janë dy emra të njohur të muzikës turbofolk. Prej vitesh janë të angazhuar në muzikën ‘live’ në kryeqytet dhe me koncertet e festat në diasporë. Gjithashtu i kemi parë edhe në bashkëpunime me këngëtarë të njohur shqiptar.
Mandi Nishtulla dhe Marsel Ademi janë dy këngëtarët që na kanë befasuar me historinë e tyre. Marseli i ftuar në “Zonë e Lirë” zbuloi se ai dhe Mandi janë vëllezër binjak, por janë ndarë që në fëmijëri nga familjarët.
Marseli tregoi se si prindërit e tij biologjik ia bënë dhuratë atë dajës së tij sepse ata nuk kishin mundësi të kishin fëmijë. Të vërtetën e mësoi kur ishte vetëm 8 vjeç, por kjo nuk ndryshoi asnjë gjë në raportin e tij me prindërit që e rritën dhe prindërit biologjik.
“Unë jam ky që jam falë prindërve të mi. Më kanë rritur me të gjitha të mirat dhe u jam shumë mirënjohës”, tha Marseli në “Zonë e Lirë” teksa tregoi historinë e jetës së tij.
Pavarësisht se u rritën nga dy familje të ndryshme, Mandi dhe Marseli kanë qenë gjatë gjithë jetës bashkë dhe të dy shfaqën talentin dhe pasionin për muzikën.
