Një muaj më parë Vlora u trondit nga një krim makabër, ku Salkie dhe Olsi Hoxhallari, nënë e bir, u vranë dhe u dogjën në banesën e tyre. Ngjarja ndodhi në lagjen “24 Maji”, teksa nënë e bir u gjendën me shenja dhe të djegur në banesë.
Policia e Vlorës ka arritur të zbardhë ngjarjen duke vënë në pranga autorët e dyshuar të ngjarjes. Sipas “Ballkanweb” forcat blu kanë arrestuar nusen e viktimës, Hysnie Hoxhallari, 32-vjeçe, banuese në Vlorë, si dhe Kasëm Pirjas, 26-vjeç, banues në Strum të Fierit.
Ata dyshohet të kenë masakruar viktimat dhe më pas i kanë vënë flakën shtëpisë për të djegur provat dhe për ta bërë ngjarjen të duket aksidentale.
Dy të dyshuarit kanë pasur një lidhje dashurie së bashku dhe me sa duket kjo ka qenë arsyeja që i ka shtyrë drejt eliminimit të bashkëshortit dhe vjehrrës së 32-vjeçares Hysnie Hoxhallari.
Sipas “News 24” dyshimet se nusja mund të ishte autorja e krimit nisën për shkak të dëshmive të saj kontradiktore, por edhe insistimit të saj për prishjen e godinës ku bashkëshorti dhe vjehrra e saj humbën jetën.
