Javën e kaluar në tapetin e kuq të “Golden Globes” më shumë sesa për veshjen, Kendall Jenner u përfol për fytyrën me akne. Në fakt modelja e ka pasur prej kohësh problem fytyrën e acaruar, por ajo kishte gjetur shpëtim te dermatologia Dr. Kidd.
Vitin e kaluar modelja rrëfeu se iu nënshtrua një terapi prej 3 vitesh, si dhe një rutine të kujdesshme për lëkurën. Duket se tashmë problemi i është kthyer sërish ose thjesht ka qenë në ditët e këqija të muajit.
Gjithsesi dermatologia Dr. Kidd ka disa këshilla për të gjitha femrat, që kanë të njëjtin problem. Nëse vuani nga aknet, ajo thotë se jeni duke gabuar diku.
“Nuk duhet kurrë që ta lash fytyrën me diçka gërryese. Të mos përdorësh skrab, as furçë rrotulluese, as copë. Duhet ta trajtosh shumë butësisht dhe thjesht ta lash shumë mirë me duar”, është shprehur ajo.
Shumë njerëz që vuajnë nga aknet, të dëshpëruar që nuk i largojnë dot, përdorin metoda të ashpra pastrimi, por ky kujdes mund t’i rëndojë ato.
Dr. Kidd tha për “Seventeen”: “Shpesh zbuloj që pacientët e mi kanë blerë dhe përdorin shumë më tepër produkte nga ç’duhet, që e bëjnë lëkurën e tyre dhe më keq”.
Sipas saj nuk duhen përdorur furçat pastruese sepse duke përdorur gërryerjen mbi aknet mund të rrisësh inflamacionin e puçrrës duke e përkeqësuar atë, ose edhe më keq, copat si peshqirë për pastrimin e fytyrës, të cilat gjithashtu mund të jenë shumë të forta, përhapin bakteret.
Kështu, përdor vetëm pastruesit, kremrat dhe maskat e buta, duke vazhduar me kremrat hidratues që kontrollojnë yndyrën dhe nuk bllokojnë poret.
Burimi: Seventeen
