Rikthimi i virgjërisë është një fenomen në rritje në Tiranë, veçanërisht në 20 vitet e fundit. Femrat që zakonisht i nënshtrohen kësaj ndërhyrje i përkasin moshës 18-30 vjeç, dhe kanë vendosur të lënë pas jetën seksuale duke e paraqitur veten si të virgjër në sytë e partnerit, ose bashkëshortit të ardhshëm.
Emisioni “Boom” përdori kamerat e fshehta për të pyetur mjekë në spitalet shtetërore dhe private. Në spitalet shtetërore, siç tha dhe mjekja, “është procedurë që nuk lejohet, por as ndalohet” dhe rruga e vetme për ta marrë si shërbim, është besimi mes pacientit dhe mjekut. Nuk u fol për shifra, megjithatë nga informacionet e mëparshme, ky operacion kushton deri në 200 euro.
Ndërsa në spitalet private, situata është krejt tjetër. Mjekët janë të hapur ndaj procedurës dhe i përcjellin vajzat me shpjegimet e nevojshme:
“Himeni qepet, momentin ta bëj me skicë. Atëherë ky është eruficiumi vaginal, dakord? Gjendja origjinale është himeni këtu. Këtu është uretra ku del urina dhe gjatë kontaktit të parë, kjo zona këtu që është cipë e hollë fare, hapet gjatë penetrimit. Atëherë mundohet të riparohet gjithçka nga mënyra si ka qenë. Kjo do hapet prapë dhe do gjakoset.”
Zgjat 15 minuta nën anestezi normale dhe mjafton të mos kryesh marrëdhënie për një muaj ose dy.
“Kushton nga 300 deri në 1200 euro, varet se [në] çfarë grade është.”
