Spektakli “C’est la vie” nisi ndryshe këtë të diel. Pas ndarjes nga jeta e kompozitorit të madh Aleksandër Lalo, ishte menduar që edhe këtë të diel të vijohet të transmetohej edhe një puntatë tjetër e regjistruar me të madhin Lalo, por me sa duket për të gjithë do ishte shumë e vështirë.
Produksioni, i cili ndërpreu emisionin edhe të dielën e kaluar kur kompozitori mbylli sytë, vendosi që kjo natë t’i dedikohej tërësisht atij dhe krijimtarisë artistike që ka lënë pas si një thesar të vyer për muzikën shqiptare.
Marina Vjollca e nisi emisionin me një dedikim që përloti jo vetëm atë, por të gjithë ata që adhuronin muzikën dhe atë ç’ka përfaqësonte Aleksandër Lalo.
“Është e vështirë ta mendosh që kjo mbrëmje do të zhvillohet sonte…”: tha Marina e mbytur nga emocionet.
E përlotur moderatorja tha se kjo do të jetë një natë homazh, e gjitha e dedikuar dhe realizuar për nder të të madhit Aleksandër Lalo.
“Sonte e zhvillojmë këtë mbrëmje pa prezencën e të madhit Aleksandër Lalo, pa prezencën e një artisti që publiku shqiptar e ka dashur shumë. Ishim mësuar ta shihnim aty, por sonte ai na mungon shumë, i mungon plejadës së shkëlqyer të kompozitorëve, i mungon ekranit. Sidoqoftë, do të jetë prezent me krijimtarinë e shkëlqyer që na la, ai do të jetë prezent me muzikën e tij, me këngët e tij të bukura”: tha Marina e përlotur.
“Gabimi i Mirelës”, “Zgjodha njeriun”, “Kur ishim bashkë ne të dy”, “Kur ishim të vegjël”, etj. U sollën në skenën e “C’est la vie” nga artistët pjesëmarrës të këtij spektakli.
