Rreth 2500 vrapues nga 40 shtete të botës do të marrin pjesë këtë të diel në Maratonën e Tiranës. Midis vrapuesve do të marrin pjesë edhe disa personazhe të njohur dhe kanë dhe një detyrë të rëndësishme për të bërë: një sasi të përcaktuar kilometrash. Gazetarët Mira Kazhani dhe Endri Xhafo do të vrapojnë 21 km, po ashtu edhe atletja Luiza Gega.
Ndërkohë Kryetari i Bashkisë Erion Veliaj do të vrapojë 10 kilometra së bashku me prezantuesit Anjeza Maja, Dorian Ramaliu, Iva Korumi, Florian Agalliu si edhe futbollistin Kristi Vangjeli. Vrapit prej 10 kilometra do t’i bashkëngjitet edhe rekordmenia, atletja Klodiana Shala.
Për ta kthyer këtë garë sportive në një ditë feste, Bashkia e Tiranës fton gjithë qytetarët e Tiranës që nuk garojnë, të dalin në datë 15 Tetor dhe të mbështesin sportistët pjesëmarrës.
Të interesuarit të cilët do të regjistrohen fillimisht do të përcaktojnë së bashku me stafin organizator detyrat që duan të realizojnë dhe më pas do të trajnohen për to.
Të gjithë pjesëmarrësit në fund të eventit do të shpërblehen me një certifikatë pjesëmarrje të nënshkruar nga Kryetari i Bashkisë.
Ndërkohë që, të gjithë ata që tashmë janë regjistruar, bip-in mund ta tërheqin në datat 13 dhe 14 Tetor nga ora 09:00-20:00 te Sheshi Nënë Tereza.
