Është 2018-ta dhe na duhet ta pranojmë që shumë gjëra kanë ndryshuar. Tani të gjithë fëmijët mbajnë celularë dhe mësimi po bëhet në mënyrë dixhitale. Dhe këto ndryshime e kanë bërë jetën e një nxënësi disi më të lehtë, por për një gjë jemi të sigurt, nxënësit e viteve ’90 e kishin jetën më të bukur.
Ne listuam disa gjëra që nxënësit e atyre viteve, qoftë në fillore apo 8-vjeçare, nuk mund t’i harrojnë. Nëse kemi harruar diçka na e kujtoni!
1.Dhuratë mësueses: Lule nga bahçja
Meqë jemi dhe në ditën e “7 Marsit” po e nisim nga dhuratat për mësuesit. Në vitet ’90 nxënësit duket se nuk e mundonin shumë veten apo prindërit, as nga ana financiare. Mjafton t’i bëje një tufë me lule, qoftë edhe nga ato të mbjella nga bahçja, apo një vazo që kishte rritur mami dhe ishte e kënaqur. Tani nuk mund të flasim për të njëjtën zgjidhje.
2.Maksimumi të jepnin 50 lekë me vete
Ishte koha kur nëse kishe 50 lekë, që ta kishin dhënë prindërit, atëherë quheshe me “fat” ose “i pasur”.
3.Vizorja ishte mjet “i frikshëm”
Nëse kishte një objekt shkolle që e përdorje për funksione të ndryshme, ajo ishte vizorja. Nuk ishte vetëm një mënyrë për të bërë matje në orën e matematikës, por përdorej në vendin e shopit të dirigjentit të mësuesit ose për të dhënë një “ndëshkim” te duart ose në kokë.
4.Pastrimi i dërrasës së zezë me radhë
Pasi mësuesi mbaronte së shpjeguari një ushtrim dhe nuk kishte cep të dërrasës së zezë bosh, dikush nga klasa që kishte radhën dhe ndodhej në rreshtin e parë, duhej të çohej dhe ta fshinte.
5.Zbukurimet bëheshin me letra
Nëse kishte ndonjë festë apo ditëlindje zbukurimet bëheshin nga nxënësit. Me letrat me ngjyra, që i bashkonim, bëni rripa për t’i ngjitur nëpër mure.
6.“Kush ka shkumës?”
Shkumësi ishte një nga gjërat që nxënësit kishin më shumë fiksim. Në çantën dhe shtëpinë e tyre gjeje pafund shkumësa, sa shpesh mësuesit u kërkonin nxënësve nëse kishin ndonjë shkumës. Të preferuarit ishin ata me ngjyrë.
7.Dhurata e shokut të klasës: bojëra dhe fletore punëdore
Nëse një nga shokët/shoqet e klasës kishte ditëlindjen mblidheshin aq para sa për të blerë një pako me bojëra dhe ndonjë fletore punëdore.
8.Goma “magjike”
Ekzistonte ai thashethemi se ana blu mund të fshinte stilolapsin, kur në fakt vetëm griste fletoren.
9.Gjatë pushimit pinim ujë te shtëpia e shokut
Shkolla për shumë nxënës ishte në anën tjetër të rrugës nga shtëpia jonë dhe gjatë pushimit nëse t’i ikje për të marrë diçka për të ngrënë, e gjithë klasa të vinte nga pas për të pirë ujë.
