Rasti i zhdukjes misterioze të Bleona Matës rikthehet sërish në vëmendjen e publikut, pas deklaratës shokuese të nënës së saj.
Kanë kaluar 8 vite nga koha kur Bleona, në atë periudhë vetëm 7 vjeçe, u zhduk në mënyrë misterioze pasditen e 22 majit të 2010-s, teksa kulloste bagëtitë në malin e fshatit Zapod të Kukësit, së bashku me 5 vajza të afërme të saj.
Nëna e 15-vjeçares, Bukurie Mata, u shpreh sot për “Fax News” se ajo ka marrë sinjalizime të vazhdueshme lidhur me vendndodhjen e saj, por nuk ka asnjë mbështetje nga shteti për të bërë të mundur kontaktin me të.
Sipas saj, një emigrant shqiptar në Londër i pohoi se e ka parë vajzën dhe i ka dërguar asaj foto. Bukuria shprehet se në foto është pikërisht vajza e saj Bleona edhe pse e sigurt plotësisht do të ishte vetëm nëse do ta kishte përballë.
Që në 2016-n ajo u shpreh se kishte pamje që vajza e saj ndodhej pikërisht në Londër. Ajo u shpreh sot se, një person nga Maqedonia i kërkon 25 mijë euro që t’i mundësojë kontaktet me vajzën.
Më tej ajo shtoi se përgjegjësinë për humbjen e vajzës së saj e kanë vetëm 5 vajzat që ishin me Bleonën në momentin që ajo u zhduk. Sipas saj ato e dinë se ku ndodhet Bleona Mata, por policia nuk ka marrë në asnjë moment mundimin që të vazhdojë me hetimin e çështjes.
