Ministrja e Shëndetësisë, Ogerta Manastirliu tha në seancën e sotme në Kuvend se numri i rasteve me koronavirus në Shqipëri është 773 të prekur, pra 7 më shumë se një ditë më parë.
Ajo njoftoi gjithashtu se janë 470 të shëruar, 15 prej tyre vetëm në 24 orët e fundit.
“Ne sot kemi 272 persona aktivë ndër 773 raste pozitive, 470 janë të shëruar. Do të thotë që jemi ende në fazë aktive të epidemisë. Edhe pse po bëjmë hetime aktive aty ku ka vatra. Sot konstatojmë 100 vatra aktive kryesisht familjare dhe në punë”, tha ministrja.
Deklarata e plotë e Dr. Marjeta Dervishi nga Instituti i Shëndetit Publik:
Si çdo ditë, ju bëjmë me dije të dhënat e 24 orëve të fundit sa i përket të prekurve nga COVID 19 ku sot rezulton se numri i pacientëve të shëruar është dyfish më i lartë se i qytetarëve që janë prekur nga ky virus. Nga rezultatet e testimeve në 24 orët e fundit janë konfirmuar 7 raste pozitive me COVID19, nga të cilat 3 raste janë në Krujë, 2 raste në Tiranë dhe 2 raste në Shkodër.
Gjatë 24 orëve të fundit janë testuar 225 persona të dyshuar me COVID-19. Deri në këto momente janë testuar 8253 raste të dyshuara dhe prej tyre janë të konfirmuar pozitivë me COVID-19, 773 raste. Gjatë 24 orëve të fundit, 15 pacientë të tjerë i janë shtuar listës së të shëruarve, duke e çuar totalin e të shëruarve nga COVID-19 në 470.
Aktualisht në vendin tonë janë 272 pacientët aktivë me COVID19 dhe siç shihet numri i të shëruarve vazhdon të jetë më i lartë prej më shumë se dy javësh.
Deri tani 31 qytetarë e kanë humbur betejën me këtë sëmundje, megjithë përpjekjet e stafit mjekësor. Ju informojmë se, në shërbimin infektiv aktualisht janë 31 të shtruar. 6 pacientë janë në terapi intensive. Në spitalin COVID 2 “Shefqet Ndroqi”, janë 5 pacientë të shtruar. 1 pacientë është në terapi intensive në gjendje më të rënduar.
Në dy spitalet COVID aktualisht po marrin shërbim 36 pacientë.
Kujtojmë se ditën e djeshme, kryeministri Edi Rama bëri me dije se deri më 11 maj do të ketë masa të reja lehtësuese.
Ndërkohë theksoi se nuk do të ketë ulje pagash apo pensionesh.
Përsa i përket situatës në botë, vihet re se shtetet europiane kanë një përmirësim të ndjeshëm.
Problematike vazhdon të jetë SHBA-ja dhe Britania e Madhe.
Në SHBA numri i viktimave ka arritur shifra të frikshme, ndërsa Britania e Madhe ka një kurbë që luhatet nga dita në ditë.
