Të jesh gruaja e një politikani është sa e thjeshtë edhe e vështirë. Gjatë gjithë kohës je në qendër të vëmendjes dhe duhet të shfaqesh e kuruar deri në detaje në çdo dalje publike.
Zonjat e politikanëve i shohim shpesh në media, në evente të ndryshme dhe pse jo edhe në takime politike. Ato përveçse shoqëruese të bashkëshortëve të tyre janë edhe një mbështetje e madhe për ta. Epo nuk thonë kot: “Pas çdo mashkulli të suksesshëm qëndron një grua e fortë”.
Mirëpo ajo që na bie në sy të gjithëve është stili i tyre i veçantë i veshjes. Plot elegancë dhe shije ato në jo pak raste bëhen objekt referimi edhe për njerëzit e tjerë. Por kush janë disa nga bashkëshortet e politikanëve shqiptarë të cilat shquhen për stilin e tyre të veçantë të veshjes?
Kryebashkiaku Erion Veliaj ka në krahë një bashkëshorte që dallohet për look-un e saj të veçantë. Ajola Xoxa në çdo dalje publike shfaqet gjithë stil dhe e kuruar deri në detaje. Ajo është tepër sharmate dhe ka një shije të rafinuar.
Veshjet e ngushta pas trupit dhe kostumet elegante nxjerrin në pah linjat e saj perfekte. Edhe pse është në pritje të ëmbël dhe së shpejti do të bëhet nënë e një djali ajo përsëri shfaqet më elegante se kurrë.
Bashkëshortja e ish-kryeministrit Sali Berisha, zonja Liri Berisha është tepër aktive me daljet e saj publike, jo vetëm për të shoqëruar bashkëshortin e saj, por edhe në angazhimet e saja si drejtuese e një prej fondacioneve më të njohura shqiptare.
Në çdo dalje të saj publike, në takime politike brenda dhe jashtë Shqipërisë, në evente të ndryshme sociale dhe kulturore zonja Liri Berisha shfaqet e veshur me kostume mjaft elegante apo me fustane që e tregojnë atë mjaft sharmante. Ajo preferon të eksperimentojë me ngjyra të ndryshme, por gjithmonë të kombinuara plot shije.
Kryeministri Edi Rama dhe bashkëshortja e tij, Linda Rama janë një ndër çiftet më simpatikë të politikës shqiptare. Megjithëse Linda Rama preferon të mos dalë shpesh në media, sa herë që shfaqet në ekran ajo dallohet për stilin klasik plot shije, dhe në jo pak raste edhe për stilin sportiv duke iu përshtatur bashkëshortit të saj i cili është adhurues i atleteve.
Pantallonta, bluzat, këmishat dhe fustanet e gjera të kombinuara plot shije janë disa nga zgjedhjet e Lindës në daljet e saj publike me kryeministrin, apo në xhirot e pasdites me të birin, Zahon.
Bashkëshortja e ish-deputetit Koço Kokëdhima, Brixhida Kokëdhima është një ndër femrat më të kuruara. Duke qenë se vishet nga e bija, Bora Kokëdhima, e cila është një stiliste e njohur në vendin tonë, Brixhida duket perfekte në çdo dalje të saj publike, por edhe në jetën e saj të përditshme. Ajo kujdeset jo vetëm për veshjet e saj, të cilat ia ka lënë në dorë vajzës së saj, por edhe për stilimin e flokëve.
Brixhida preferon të eksperimentojë vazhdimisht me look-un e saj. Herë e shohim të veshur tepër moderne saqë sfidon edhe vajzat e saj, dhe herë të tjera preferon një stil “vintage”.
Bashkëshortja e Blendi Klosit, Ministrit të Turizmit dhe Mjedisit, Nora Gega preferon një stil të thjeshtë, por tepër modern. Ajo është nënë e dy fëmijëve dhe në jo pak raste e shohim të shfaqet sportive, ndërsa në daljet publike dhe në evente të ndryshme e shohim të veshur “chic”.
Bashkëshortja e ish-deputetit të ndjerë, Dritan Prifti është dalluar gjithmonë për look-un e saj të veçantë dhe tepër elegant. Megjithëse nuk ka preferuar të jetë shumë e pranishme në daljet publike të bashkëshortit të saj, atë e kemi parë gjithmonë në fotot që fëmijët e saj postojnë në rrjetet sociale.
E veshur me një shije të hollë dhe në jo pak raste e kombinuar edhe me vajzën e saj të vogël, Meri Prifti di të jetë gjithmonë në qendër të vëmendjes me stilin e saj të veçantë.
