Me shtimin e numrit të pacientëve nëpër spitalet COVID 1 dhe 2, është shtuar edhe numri i personelit.
Sot 50 infermierë të rinj i janë bashkuar stafit mjekësor të spitalit Covid 2 “Shefqet Ndroqi” në betejën e tyre kundër koronavirusit
E pranishme në ditën e tyre të parë të punës në këtë spital, ministrja Ogerta Manastirliu tha se një pjesë e infermierëve janë edhe ata të cilët kanë qenë në misionin e parë të dërguar në Itali dhe kanë marrë aty eksperiencën e nevojshme.
Ndonëse pak ditë më parë u tha se këta infermierë do të bëhën gati për t’iu bashkuar spitalit të tretë të Covid-it që do të hapet në vend, 50 infermierët do t’i shtohen spitalit COVID-2 bëri me dije Manastirliu.
Ministrja e Shëndetësisë tha se po bëhet një punë e madhe nga mjekët dhe infermierët në spitalet COVID, që çdo ditë trajtojnë raste të rënda të konfirmuara pozitive por edhe raste të cilat janë të dyshuara.
“Qeveria shqiptare është e angazhuar maksimalisht për të gjithë mbështetjen për personelin mjekësor, për të fuqizuar kapacitetet tona spitalore, qoftë spitaleve aktuale, qoftë spitaleve të cilat projektohen për t’i shërbyer pacientëve me Covid përgjatë periudhës së vjeshtës dhe dimrit”, tha ministrja.
Manastirliu deklaroi se pavarësisht masave të marra, roli i qytetarëve është vendimtar për këputjen e zinxhirit të infeksionit, duke bërë apel për të zbatuar masat e thjeshta.
“Është në dorën e secilit prej nesh këputja e zinxhirit të infeksionit, duke zbatuar masat e thjeshta, me vendosjen e maskës, ruajtjen e distancimit fizik dhe higjienën personale. Kjo është për të mirën e përbashkët dhe për shëndetin e qytetarëve”, tha Manastirliu.
/abcnews.al
