Një ndër aktorët më të dashur italianë, Alessio Boni vjen në rolin e një babai autoritar, me një grua që kërkon vëmendje diku tjetër kur nuk e gjen pranë tij, dhe tre fëmijë që duan të ndjekin figurën e të atit.
Seriali “La strada di casa” ose “Back Home” sjell një histori shumë origjinale, të një pronari ferme që quhet Fausto Morra, i cili përfshihet në një seri ngjarjesh kriminale që ndryshojnë jetën e tij dhe atë të familjes.
Midis një të kaluare që duhet rindërtuar dhe një të tashme plot pasiguri, ai është gjithmonë në kërkim të një të vërtete të pakapshme që do ta kthejë atë dhe të dashurit e tij drejt rrugës për në shtëpi.
Si zhvillohet historia
Fausto Morra ka një jetë shumë të ngarkuar me punë në fermë, nga e cila lë pas dore edhe bashkëshorten e tij, por sërish gjen kohë për një lidhje jashtë martesore. Në momentin kur ai vendos më në fund të kthejë sytë nga partnerja, (Lucrezia Lante della Rovere) nëna e 3 fëmijëve të tij, ndodh edhe tragjedia.
Pas një nate pasionante me bashkëshorten, Fausto largohet papritur me justifikimin se do të dalë të peshkojë. E shoqja e telefonon për ta pyetur dhe ai i thotë se do të kthehet, vetëm se atë mëngjes ai pëson aksident. Fausto më pas kalon 5 vjet në koma, dhe zgjohet në gjendje të rëndë, në pamundësi për të ecur dhe për të kujtuar çfarë ndodhi.
Asgjë nuk është si më parë!
Vetëm se ai nuk është i vetmi që ka pësuar një aksident 5 vite më parë. Një djalë i ri i cili ishte ngarkuar me detyrën për të mbikqyrur Fauston, dhe e kish kapur atë me shkelje në punë, ishte zhdukur po atë ditë! Çfarë kishte ndodhur me të?
Fausto është i dyshuari kryesor dhe sikur të mos mjaftonte kjo, ai do të përballet me ndryshime të mëdha në familje. Bashkëshortja tashme ka krijuar një lidhje të re me shokun e tij, fëmijët janë rritur dhe Fausto ka dhe një djalë 4 vjeç që erdhi si frut i natës pasionante që kaloi me partneren.
Pas pesë vjetësh në gjendje kome dhe i frikësuar nga ajo që mund të zbulojë, Fausto shkon në kërkim të së vërtetës që fsheh kujtesa e tij pas aksidentit, duke rrezikuar të humbasë gjithçka.
Ka kryer vallë një vrasje? Nëse po, ku e ka fshehur trupin? Do ta përballojë ai ndarjen nga bashkëshortja të cilën ende e dashuron?
“La Strada di Casa” është në tërësi një punë e shkëlqyer, e gjallë dhe e artikuluar, plot ide dhe artikulime, me një kast që bashkëpunon në harmoni.
Kombinimi i së kaluarës dhe së tashmes është i rrjedhshëm, i qartë, historia mbi të gjitha është tërheqëse dhe e përfshin shikuesin. Një i bukur dhe plot ndjenja.
