Adelina Ismajli është ndoshta e vetmja artiste shqiptare që për nga guximi në performancat e saj skenike dhe jo vetëm, e meriton emërtimin “diva”.

Pak më parë, ajo u shfaq krah reperes së re Rina në studio dhe duket se po paralajmërojnë një projekt të ri!

 

View this post on Instagram

 

Cila kong mundet me kon??? shume shpejt @adelinaofficiel ??

A post shared by RINA (@balajrina) on Jun 5, 2019 at 7:23am PDT

Dhe nuk do të ishte çudi nëse Adelina ka zgjedhur të bashkëpunojë me një artiste të re. Ndër vite, ajo ka treguar se ka një nuhatje të paparë për gjërat që do të kthehen shumë shpejt në fenomen dhe shumë gjëra që tani i quajmë të zakonshme në skenë, Adelina i ka bërë shumë kohë përpara të gjithëve.

Zhveshja e paharrueshme në skenën e Festivalit të Këngës në 1997-ën

Kur Shqipëria akoma s’e kishte marrë veten nga gjithë informacionet e reja që hynë nga bota pas hapjes së kufijve, Adelina erdhi në festivalin më të rëndësishëm shqiptar, këndoi, doli me të brendshme dhe një tyl të kuq dhe që atëherë, “Zemrën nuk ta fal” nuk na hiqet më nga mendja.

Kuptohet që sot, zhveshjet janë mëse të zakonshme në skenat tona.

Body i famshëm me rrip në mes, 13 vite përpara se të shpërthente Lady Gaga

Për të interpretuar një këngë popullore të ndërthurur me rock-un e Elita 5, Adelina Ismajli zgjodhi këtë look të pagabueshëm me një body të zi, rripa dhe çorape të gjata, si edhe gërsheta afrikane që tani janë kaq në modë.

Ky look është edhe arsyeja përse dëgjojmë shpesh të thuhet se Adelina ka veshur body me shekuj përpara Lady Gaga-s në 2010-ën.

Me kostum burrash dhe cigare para Lady Gaga-s

Ose Lady Gaga e kopjon, ose mendjet e mëdha mendojnë njësoj pasi këtë avazin e veshjes si burrë duke tymosur duhan, Adelina e ka bërë që në 2005-ën.

Duke luajtur rolin e një pijaneci që i pëlqen tallavaja, ajo këndoi me Naim Krasniqin “Kasandra”.

Një skenë shumë të ngjashme e ka realizuar Lady Gaga në 2011-ën në çmimet VMA të MTV-së, ku u shfaq në petkun e personazhit Jo Calderone, të krijuar për këngën e saj “You and I”.

Video horror përpara Dafit dhe Ledrit

Videoklipi “Largohu nga frajeri im” i Adelinës është i pari ku një këngëtare guxon të dalë si lugat në një klip, ku edhe tani- lëre atëherë- të gjithë përpiqen të duken më të pashëm se kurrë.

Në 2011-ën, Dafi dhe Ledri publikuan videon “Po m’pëlqen”, që ishte po ashtu shumë avantgarde për kohën sepse mesa duket, të dalësh me lente të bardha u duket ide e mirë vetëm Adelinës dhe Dafinës.

Bashkëpunim me Gashin, 4 vite para kontratës së tij me Jay Z

Pak e mbajnë mend, por në 2013-ën Adelina publikoi një bashkëpunim me reperin asokohe të ri Gashi.

Ai nuk kishte akoma famën që ka sot nëpër botë, por Adelina e kishte pikasur dhe vendosi të bashkëpunojë me të për këngën “Karma”.

Pritja e publikut mund të kishte shkuar më mirë, megjithatë pak i kuptojnë gjërat kur janë kaq shumë para kohe.

Në 2017-ën, Gashi firmosi një kontratë me shtëpinë diskografike Roc Nation të themeluar nga Jay Z dhe sot, është ndër reperët më të suksesshëm të momentit.