Arsyeja pse vendosesh shpesh në siklet para kur njeh njerëz të rinj lidhet shpesh me një kompleks që ke me veten. Kompleksi im lidhet me dhëmbët! Të gjithë e kemi parasysh atë momentin kur ke një pasiguri dhe mundohesh ta fshehësh. Kur parregullsia te dhëmbët është shumë e dukshëm, sikleti për të buzëqeshur është gjatë gjithë kohës.
Ndërsa shumica e atyre që kanë pasur probleme me rregullsinë e dhëmbëve e kanë zgjidhur në moshën e adoleshencës apo më herët, ka një kategori tjetër njerëzish që po përpiqen të bëjnë një hap për të ndryshuar buzëqeshjen e tyre edhe në të 20-at apo 30-at.
Jo vetëm që dhëmbët e drejtë janë më tërheqës, por mund të mbahen më lehtë të pastra, për këtë arsye japin më pak probleme, si prishja e ndonjë dhëmbi.
Okej e di që të vendosësh tela nuk është gjëja më emocionuese, por është një investim për të cilin do të jeni krenarë për shumë kohë. Nëse do të marrësh të njëjtin hap si unë, atëherë këtu ke përgjigjet e disa pyetjeve që të mundojnë prej kohësh.
1.Sa kushtojnë telat?
Ky është halli i parë që më mundoi edhe mua. Qëllimi ishte t’i vendosja, por përpara më duhej që të vizitoja disa klinika dentare për të gjetur çmimin më të arsyeshëm, por pa sakrifikuar cilësinë. Vizitat i kreva në 3 klinika të ndryshme dentare në zona të ndryshme të Tiranës.
Telat metalikë janë më ekonomiket. Çmimi mesatar që m’u ofrua ishte 900 euro dhe çdo vizitë që më duhej për shtrëngimin e aparatit ortodontik herë pas here ishte falas. Nëse do të zgjidhja telat qeramikë çmimi varionte në klinika të ndryshme dentare nga 1.100 euro në 1.300 euro.
Ndërsa për metodën më të fundit të teknologjisë, të njohur me emrin “Invisalign 3D”, më ofruan një çmim nga 1.100 euro në 1.600 euro. “Invisalign” është një mbështjellëse plastike e dhëmbëve dhe çmimi që më takonte të paguaja do të varej nga maskerinat që do të krijoheshin për të rregulluar problemin tim.
Zgjidhja ime ishte që pagesën ta bëja me këste. Mos harroni që një nga pyetjet kryesore kur shkoni për t’u interesuar për telat është që të pyesni për mënyrën e pagesës. Shpesh klinikat dentare ofrojnë mundësinë që të paguani një kosto të caktuar çdo muaj, deri në fund të trajtimit tuaj.
2.A të dhembin?
Përgjigja është “po”. Por para se t’ju kapë paniku, ashtu siç më ndodhi dhe mua, kuptova që sikleti që të jep aparati zakonisht është aq i vogël, sa një dhimbje e lehtë koke. Dhimbja më e madhe zakonisht ndihet në ditët e para dhe pas shtrëngimit. Kjo është një dhimbje e vogël e nofullës ose si një presion. Për ta mbajtur nën kontroll, mbaja akull ose perime të ngrira jashtë nofullës dhe konsumoja qetësues.
3.Çfarë ushqimesh nuk duhet të ha?
Kur vendosa fillimisht telat ishte si një ndjesi e çuditshme dhe ishte paksa e vështirë që të haja shumicën e ushqimeve, sepse ndjeja pak dhimbje në nofull. Gjatë kësaj kohe haja ushqime të buta, si makarona, kos, supë. Me kalimin e kohës ndërsa ikte sikleti fillova të haja ushqime të tjera. Por dentisti më dha një listë me ushqimet që duhet të shmangia:
- Ushqimet e forta, si arrat, karamelet, patatet e skuqura.
- Ushqimet që mezi përtypen, si mishi i tharë.
- Ushqimet që ngjisin nëpër dhëmbë, si çamçakëzi.
- Ushqimet që duhet t’i kafshosh, si molla apo kalliri i misrit.
Shpesh ushqimet duhej që t’i prisja të vogla në mënyrë që t’i konsumoja. Ata që do të zgjedhin aparatin “Invisalign” në vend të atij tradicional nuk duhet të shqetësohen për ushqimet që konsumojnë, mjaftojnë që ta heqin sa herë që kanë vaktin e ngrënies. Përpara se të hahet një ushqim, maskerina duhet të hiqet për t’u vendosur sërish pas përfundimit.
4.Për sa kohë duhet t’i mbaj?
Kjo është në varësi të problemit që ka gjithsecili. Por mesatarisht telat e zakonshëm metalik apo qeramikë, marrin deri në 1 vit e gjysmë (18 muaj), ndërsa aparati “Invisalign” merr një kohë më të shkurtër, 5-8 muaj. Këto të fundit duhet të mbahen 22 orë gjatë ditës.
5.Si duhet të kujdesem për dhëmbët kur kam tela?
Gjëja kryesore që bëra ishte dieta në ushqim, eliminova ushqimet që ndikojnë në ngjyrën e aparatit. Kjo do të thotë që shmanga edhe ushqimet me sheqer, pasi mund të shkaktojnë shtimin e baktereve duke çuar në prishjen e dhëmbëve. Ato që nuk mungonin kurrë në çantën time ishin furça, pasta e dhëmbëve dhe furçe dentare (ajo për pastrimin e telave). Gjithashtu procesi i larjes së dhëmbëve zgjaste më shumë, por sigurohesha që ta bëja në mënyrën e duhur.
Mund t’ju duket si shumë e lodhshme, por kur të shikoni rezultatin atëherë do të kuptoni që gjithë ky mundim ia vlejti.
