Kryeministri Edi Rama ka vlerësuar bilancin e ulët të të prekurve me COVID-19 në vend gjatë ditëve të fundit dhe ka lajmëruar lehtësime të tjera në vijim.
Që prej ditës së sotme, në zonën e gjelbër me më shumë masa lehtësuese janë futur 18 bashki:
Tropoja, Rrogozhina, Peqini, Belshi, Cërriku, Gramshi, Ura Vjagurore, Kuçova, Berati, Poliçani, Skrapari, Devolli, Pusteci, Maliqi, Mallakastra, Kolonja, Vlora dhe Selenica.
Gjithashtu, duke nisur nga sot, në të gjithë vendin do të lejohet shërbimi taksi për udhëtimet ndërqytetase, me deri dy pasagjerë, anëtarë të një familjeje.
Për më tepër, janë bërë lëshime për të riatdhesuarit që banojnë në zonat e kuqe.
Sipas kryeministrit, ata mund të vetëkarantinohen në banesat e tyre.
Më tej, më datën 11 maj do të vijojnë masa të tjera lehtësuese, me hapjen e parukerive, berberëve, klinikave dentare dhe dyqaneve në qendra tregtare.
Për më tepër, do të lejohet lëvizja e automjeteve pa autorizim brenda qarqeve, nga ora 05:00 deri më 17:30.
Të gjithë të riatdhesuarit do të karantinohen në banesën e tyre.
Në vijim, 18 maji do të hapë shërbimet bar/restorant deri në orën 17:30 vetëm në mjediset e jashtme, sipas kushteve strikte të Protokollit të Ministrisë së Shëndetësisë.
Gjithashtu do të shtohen fluturimet e riatdhesimit, ndërsa personat e rikthyer do të vetëkarantinohen në shtëpi.
