Një grindje mes vëllezërve të mitur përfundoi në tragjedi paraditen e sotme në fshatin Baltëz, të Fierit. 13-vjecari Gj.Veizi ndërroi jetë në spital pasi u qëllua me thikë nga vëllai i tij i mitur, 10-vjeçari K.Veizi.
Gjyshi i të ndjeri foli për mediat lidhur me ngjarjen e rëndë, duke treguar se lajmin e hidhur e mësoi në spital, ku ndodhej për vizitë.
Ai rrëfehet se dy vëllezërit ndodheshin në shtëpi vetëm, pasi nuk kishin shkruar në shkollë, ndërsa prindërit ishin në punë në Vlorë. Gjyshi i 13-vjeçarit nuk është në dijeni për motivin e ngjarjes, teksa shprehet për situatën se duhet të ketë dalë jashtë kontrollit.
“Lajmin për nipin e mësova ne spital, se isha për vizitë. Pashë makinën që erdhi me shpejtësi, aty kuptova se çfarë kishte ndodhur, pashë nusen e nipit që zbriti dhe e pyeta çfarë kishte ndodhur. Djemtë kishin qenë vetëm në shtëpi dhe ishin zënë në oborr. Prindërit ishin në punë në Vlorë. Fëmijët nuk kishin shkuar në shkollë sot, ndërsa doktorët më thanë se nipi erdhi i pajetë në spital. Mendoj se fëmija pa prindërit është jashtë kontrollit”, tregoi gjyshi.
