Si sot para 1 viti kinemtaografia e teatri shqiptar humbën një nga figurat më të shquara, aktorin e madh Xhevdet Ferrin. I ndjeri humbi jetën në moshën 59-vjeçare, për shkak të një sëmundje të rëndë. Në këtë ditë të trishtë vajza e tij, Bora Ferri, i ka dedikuar të atit disa fjalë zemre shumë emocionuese.
Ajo shprehet se gjatë këtij viti që i ka munguar figura atërore ka marrë shumë leksione jete, që nuk i kishte marrë kurrë në 34 vitet e rrugëtimit me babanë e saj.
“Hi papi, prapë unë, ‘xhandari i vogël’, epiteti që mendoje se më shkonte më shumë për shtat këto vitet e fundit. Sot bëhet një vit që nuk je më fizikisht mes nesh. Jo se ka ndonjë domethënie për mua sepse që prej asaj dite koha s’është më lineare për mua.
Datat janë gjithashtu shumë konvencionale, pa ndonjë domethënie të madhe, ashtu siç nuk i ndjeje as ti datat e largimit nga kjo jetë e prindërve të tu. Funny hë?! Si vijnë gjërat full circle?! Për tu habitur gjithashtu se si në këtë vit që s’ke qenë me mua kam marrë prej teje leksione jete që nuk i kisha marrë në 34 vitet e rrugëtimit tonë të përbashkët.
Faleminderit për këtë, faleminderit gjithashtu që më del shpesh në ëndërr, që flasim, që përqafohemi… ashtu ftohtë siç dimë ne, pa ndonjë manifestim me ulërima. Prapë më mungon shumë në këtë dimension. Kam bindjen se ke gjetur paqen e kërkuar aty ku je tani. Ne të duam shumë këtu ku na ke lënë”, shkruan Bora Ferri.
Kujtojmë se Xhevdet Ferri ka luajtur dhjetëra role si në teatër ashtu dhe në film. I paharruar për shqiptarët ka qenë interpretimi i tij në filmin “Përrallë nga e kaluara” me regji të Dhimitër Anagnostit, në të cilin kishte rolin e Trimit. Gjatë karrierës artistike Ferri është vlerësuar dhe në filmat si “Treni niset në shtatë pa pesë”, “Hije që mbeten pas”, “Dasma e Sakos”, e të tjerë.
