Zjarri i përmasave të mëdha që shkrumboi tregun industrial në Laç mëngjesin e sotëm, dyshohet të ketë qenë i qëllimshëm.
Një tregtare ka deklaruar për mediat se pak ditë më parë se një burrë që pretendon se ka tokën aty ku ndodhet tregu, i kishte kërcënuar se do të vinte zjarrin.
Sipas saj, policia nuk bëri asnjë gjë edhe pse erdhi në momentin e përplasjes me personin në fjalë. Ajo tha se tregtarët kanë humbur miliona lekë mall dhe askush nuk do të përgjigjet për të gjithë këtë humbje:
“Këtu fajin e ka vetëm shteti. Ka një javë që na paralajmëron se do të na vendosë zjarrin. E kisha me borxh dhe pa borxh për të jetuar për fëmijët e mi. Na kanë kërcënuar këta që janë në konflikt me tokën këtu. Erdhi policia dhe nuk e shoqëroi burrin.
Janë 70 tregtarë që kanë humbur mallin dhe djersën këtu. Kanë jetuar me këto lekë. Kemi hyrë borxh me mund dhe djersë. Kush do na përgjigjet ne. Kam punuar me 3 mujor në Greqi dhe erdha e hodha lekët këtu. 3-4 mln lekë i kam humbur unë. Ka të tjerë që kanë humbur 10 mln lekë”, ka thënë ajo.
