Vijojnë kërkimet për gjetjen e trupave të grave dhe fëmijëve që u mbytën në tentativë për të kaluar Mesdheun, pranë ishullit Lampedusa, Itali më 7 tetor 2019.
Autoritetet janë bërë dëshmitarë të pamjeve të dhimbshme të filmuara rreth 60 metra nën thellësinë e ujit, nga një kamerë robot.
Kjo e fundit arriti të kapë imazhet e trishta të një nëne që shtrëngonte fëmijën e saj në gjoks, në përpjekje për ta mbrojtur.
Atë natë gjithashtu një djalë i ri i quajtur Wassim, 19 vjeç, u përpoq të shpëtojë një fëmijë tetë muajsh. Dhe ai pothuajse do t’ia kishte dalë nëse një tjetër fëmijë nuk do t’i kapej për pantallonash duke e detyruar të luftojë për jetën e tij.
Varka në të cilën ndodheshin emigrantët ishte larguar më parë nga brigjet tuniziane me rreth 50 vetë në bord, raportojnë mediat italiane.
Autoritetet arritën të nxirrnin 22 persona të gjallë nga uji, së bashku me trupat e pajetë të 13 grave. Kërkimet vijojnë dhe pamjet e tmerrshme në fund të detit janë dëshmia e hidhur e realitetit të emigrantëve që ia besojnë jetën e tyre detit.
