Prokuroria e Durrësit ka kërkuar që të dënohet me 5 vjet burg, Enertila Beqaj, vajza nga Manza, e cila u akuza se i vodhi nëpërmjet mashtrimit 60 milionë lekë, Banush Ahmatit, drejtorit të postës në këtë fshat. Ajo kishte në internet mbi 30 adresa Facebook-u dhe kishte shfaqur personalitete të shumëfishta, herë pretendonte se do lindte një fëmijë, e herë se do të martohej në muajin gusht.
Gjatë seancës gjyqësore kanë qenë të pranishëm edhe prindërit e 27-vjeçares të cilët gjatë gjithë kohës kanë kërkuar lirimin e vajzës së tyre.
Prokurori Drini Pali tha gjatë seancës se organi i akuzës gjatë gjykimit ka marrë parasysh disa fakte, duke nisur nga rrezikshmëria e personit, gjendja ekonomike dhe sociale, si dhe nga fakti që nuk ka shprehur pendesë e nuk e ka pranuar fillimisht ngjarjen.
“Nga ana jonë janë marrë parasysh disa fakte, duke nisur nga rrezikshmëria e personit, gjendja ekonomike e sociale, fakti që nuk ka shprehur pendesë e nuk e ka pranuar fillimisht ngjarjen. Kërkojmë pesë vjet heqje lirie, por me aplikimin e uljes së 1/3 së vendimit me pranimin e fajit të dënohet 3.4 vjet heqje lirie.”, tha prokurori Drini Pali.
Nga ana tjetër, avokatja mbrojtëse i kërkoi gjykatës që të thirret në gjyq edhe Banush Ahmati, ish-përgjegjësi i postës së Manzës. Mirëpo kjo kërkesë u hodh poshtë nga gjykatësi i çështjes, Petraq Curri, duke thënë se Ahmataj pas marrjes në pyetje nga gjykatësi ka thënë se nuk ka dëshirë të paraqitet në sallën e gjyqit.
Vendimi për 27-vjeçaren pritet që të jepet në seancën e radhës.
Burimi: Ballkanweb
