Magjistari i mirënjohur David Copperfield është detyruar të zbulojë sekretin që fshihet pas një prej iluzioneve të tij më të famshme, pasi ai u padit nga një burrë që pretendon se është lënduar gjatë pjesëmarrjes në magjinë e tij.
Iluzioni në fjalë, i njohur si “Lucky # 13”, ndodhi në Las Vegas në vitin 2013, kur Copperfield rreshtoi 13 persona nga publiku në skenë dhe i bëri ata të zhduken. Ai më pas zbuloi se ata kishin shkuar të gjithë “me magji” në pjesën e prapme të sallës.
Turist britanik Gavin Cox, 58 vjeç, ngriti një padi pasi ra dhe nxori nga vendi shpatullat e tij, kur mori pjesë në iluzionin e Copperfield.
Cox gjithashtu pohoi se ai pësoi dhimbje kronike dhe një lëndim në tru pas incidentit, raporton “BBC”. Avokatët e Copperfield kishin argumentuar se zbulimi i mashtrimit do t’i kushtonte financiarisht magjistarit 61-vjeçar amerikan. Por një gjyqtar në Las Vegas nuk u pajtua, duke vënë në dukje se mijëra pjesëmarrës, të cilët kishin qenë pjesë e aktit, tashmë e dinin se si funksiononte.
Chris Kenner, prodhuesi ekzekutiv i Copperfield, shpjegoi në gjykatë se si funksionoi mashtrimi, duke deklaruar se njerëzit duhet të kalonin përmes korridoreve të brendshme, kalime shumë të ngushta këto, të vendosura si brenda edhe jashtë strukturës, një lloj rruge si në garat me pengesa, dhe në errësirë, sa më shpejt të ishte e mundur.
Ishte pikërisht në këtë kohë kur po ecte nëpër korridor që turisti ra. Ai pretendon në padinë e tij se ka shpenzuar më shumë se 400,000 dollarë për faturat mjekësore, shkruan NBC News.
Natën kur u dëmtua Cox, edhe Copperfield kishte përshkuar të njëjtën rrugë për një tjetër numër magjie, pa pësuar asnjë problem. Në pritje të zhvillimit të procesit, Cox i kërkoi iluzionistit një dëmshpërblim të majmë për dëmet.
