Ju kujtohet Zhaku? Thuajse të gjithë e njohin me këtë nofkë, mirëpo emri i saj i vërtetë është Inida Gjata.
Ajo është larguar prej kohësh nga televizioni dhe nga Shqipëria po ashtu, teksa vazhdon të jetë herë pas here aktive në rrjete sociale.
Së fundmi, ajo ka dhënë një lajm shumë të bukur për ndjekësit e saj. Zhaku po bëhet nënë për herë të parë dhe është thuajse në ditët e fundit të pritjes së ëmbël.
Në llogarinë e saj në Instagram, ajo ka ndarë foto me barkun e rrumbullakosur, madje ka zbuluar edhe gjininë e bebushit që po pret.
“Do bëhemi me çun”- ka shkruar ajo krahas pozës.
Prej vitesh tashmë, Zhaku jeton në Gjermani me bashkëshortin e saj gjerman, Christian Kreuz.
Më herët, ajo ka rrëfyer se largimi drejt Gjermanisë ishte një ndër vendimet më të mira që ka marrë, ndërsa Christian e ka ndihmuar shumë.
“Ishte një vendim në fakt që erdhi pasi pata një lloj krize, një lloj depresioni. Largimin nuk e kisha kaq të bujshëm se e kam shoqëruar edhe me daljen tek Çani me këngën ‘’Censura’’. Me bujë ika, me bujë erdha.
Më bëri mirë largimi, bëri mirë Christian që më mori. Po mos të kishte qenë për Christian-in nuk do të kisha shkuar në Gjermani asnjëherë besoj, si refugjate. Edhe pse isha 31 vjeç, nuk mund të shkosh vetëm, është ndryshe kur mikpritesh atje si zonja Kreuz dhe ndryshe kur shkon si hallexhi,”-tha Zhaku asokohe.
